संजय जाधव, बुलडाणा

बुलडाण्यामध्ये पतीने पत्नीवर जीवघेणा हल्ला केल्याची धक्कादायक घटना घडली आहे. नांदुरा शहरामध्ये ही घटना घडली. काही कारणावरून झालेला वाद पत्नीच्या जीवावर बेतला. संतप्त झालेल्या पतीने धारधार शस्त्राने पत्नीवर वार केले. या हल्ल्यात महिला गंभीर जखमी झाली असून सध्या तिच्यावर रुग्णालयात उपचार सुरू आहेत. याप्रकरणी नांदुरा पोलिसांनी आरोपी पतीविरोधात गुन्हा दाखल करत तपास सुरू केला आहे.

मिळालेल्या माहितीनुसार, बुलडाणा जिल्ह्याच्या नांदुरा शहरात राहणाऱ्या कविता विष्णू खराबे यांच्यावर पतीने जीवघेणा हल्ला केला. कविता यांचे पतीसोबत गेल्या काही महिन्यांपासून वाद सुरू होते. त्यांचे प्रकरण न्यायालयात सुरू आहे. शनिवारी न्यायालयामध्ये सुनावणी होती. त्यावेळी कविता खराबे न्यायालयातून बाहेर पडल्या. त्यावेळी संतप्त झालेल्या पतीने कविता यांच्यावर धारधार शस्त्राने वार केले.

पतीने केलेल्या जीवघेण्या हल्ल्यात कविता खराबे गंभीर जखमी झाल्या. रक्ताच्या थारोळ्यात पडलेल्या कविता यांना तात्काळ नांदूर येथील ग्रामीण रुग्णालयात दाखल करण्यात आले. या रुग्णालयात प्राथमिक उपचार करण्यात आले. प्रकृती गंभीर असल्यामुळे त्यांना पुढील उपचारासाठी अकोला येथे पाठवण्यात आले. या घटनेप्रकरणी नांदुरा पोलिसांनी विष्णू खराबे यांच्याविरोधात विविध कलमांतर्गत गुन्हा दाखल केला. पोलिसांनी आरोपी विष्णू खराबेला अटक केली.