संजय जाधव, साम टीव्ही

बुलढाण्यात चाललंय तरी काय? अशी म्हणण्याची वेळ आली आहे. कारण गुन्हेगारांच्या घटना दिवसेंदिवस वाढ होत असल्याचं चित्र आहे. गेल्याच आठवड्यात एका दलित तरूणाला गाय चोरीच्या संशयावरून नग्न करून मारहाण करण्यात आली. मात्र, आता पुन्हा एकदा अशीच एक घटना समोर आली आहे. शेतातील वादातून एका दलित तरूणाला ३ ते ४ जणांनी मिळून मारहाण केली आहे. या घटनेनंतर पोलीस ठाण्यात गुन्हा दाखल करण्यात आला असून, आरोपी फरार आहेत.

अजय सोनटक्के असं दलित तरुणाचं नाव आहे. तो ट्रॅक्टरने इतरांच्या शेतात मशागतीचे काम करून आपला उदरनिर्वाह करतो . यातूनच वाद होऊन खामगाव तालुक्यातील गणेशपुर येथे तीन ते चार जणांनी या तरुणाला बेदम मारहाण केली. "तू दलित आहेस... तू आम्हाला मानत नाही का..?" अशी शिवीगाळ करत या तरुणाला बेदम मारहाण करण्यात आली.

या प्रकरणानंतर तरूणानं पोलीस ठाण्यात धाव घेतली. तसेच आरोपींविरोधात तक्रार दाखल केली. या प्रकरणी तरूणाच्या तक्रारीवरून हिवरखेड पोलीस ठाण्यात तीन जणांवर गुन्हा दाखल करण्यात आला आहे. मात्र आरोपी अद्याप फरार आहेत. सध्या पोलिसांकडून आरोपीचा शोध सुरू आहे.

दलित तरूणाला विविस्त्र करून मारहाण

काही दिवसांपूर्वी खामगावात एका दलित तरूणाला बेदम मारहाण करण्यात आली. गाय चोपरल्याच्या संशयावरून त्याला विवस्त्र करून मारहाण केल्याची माहिती समोर आली होती. तसेच विवस्त्र करून त्यांचा गायींसोबत फोटो काढण्यात आला होता. या मारहाणीत दलित तरूणाचा एक डोळा निकामी झाला असून, नाकाचं हाड मोडलं आहे. या तरूणावर सध्या शासकीस रूग्णालयात उपचार सुरू आहेत. या प्रकरणी शिवाजीनगर पोलिसांनी तीन तरूणांविरोधात गुन्हा दाखल केला आहे.