>> सचिन बनसोडे

शिर्डी : दिवाळीत शिवाजी पार्कातील दीपोत्सवानिमित्त राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि मनसेचे अध्यक्ष राज ठाकरे (Raj Thackeray) एकाच व्यासपीठावर दिसले. हे व्यासपीठ राजकीय नव्हते मात्र त्यानंतर सुरु झालेली चर्चा आता महायुतीकडे वाटचाल करत असल्याचं चित्र सध्या आहे. मनसे, भाजप, शिंदे गटातील अनेक नेत्यांनी याबाबत सकारात्मक प्रतिक्रिया दिल्या आहेत. आता राज्याचे महसूल मंत्री राधाकृष्ण विखे पाटील यांनी युतीत मनसेचं स्वागत असेल असं म्हटलं आहे.

काय म्हणाले राधाकृष्ण विखे पाटील?

शिंदे फडणवीस सरकार हे जनतेच्या मनातील सरकार असल्याने या सरकारचा जनाधार वाढत आहे. या युतीत मनसे येत असेल तर दिलसे स्वागत करायला आम्ही तयार असल्याचे सूचक वक्तव्य महसूलमंत्री राधाकृष्ण विखे पाटील यांनी केलं आहे. (Political News Update)

शिंदे फडणवीस सरकार हे लोकांसाठी काम करून निर्णय घेत आहे. महायुतीत कोणाला घ्यायचे याचा सर्वस्वी अधिकार पक्षश्रेष्ठींचा असून राजसाहेब ठाकरे यांच्या विकासाच्या भूमिकेचे आम्ही स्वागतच केले आहे. जनाधार लाभलेल्या या युतीत जर मनसे सहभागी होत असेल तर त्यांचे दिलसे स्वागतच करू, असं वक्तव्य राधाकृष्ण विखे पाटील यांनी केले आहे.