सत्तेची नशा... डोक्यात गेलेली हवा... आणि अंगात संचारलेली नेतेगिरी.. ही समोर दिसणारी विदारक दृश्यं बघून महाराष्ट्रात कायद्याचं राज्य आहे की गुंडांचं असा सवाल विचारायचीही आता लाज वाटू लागलीये. सत्ताधारी माजुरड्या नगरसेवकांच्या गुंडगिरीनं आता सगळ्या मर्यादा ओलांडल्यायेत. डोंबिवलीत डॉक्टरांना झालेल्या बेदम मारहाणीत नगसेवकाला बेड्या ठोकण्यापूर्वीच तिकडे रायगडमध्ये भाजपच्या एका गुंड नगरसेवकानं थेट मुख्याधिकाऱ्यांच्या केबिनमध्ये घुसून त्यांना तुडवलंय. नेमकं काय घडलं ? ऐका, खुद्द त्या हतबल मुख्याधिकाऱ्यांच्याच तोंडून...

ऐकलंत? प्रशासकीय अधिकारी धनंजय कोळेकर यांना त्याच्याच केबिनमध्ये घुसून कशा अमानुष पद्धतीने मारहाण करण्यात आली. हा हल्ला करणारा दुसरा तिसरा कोणी नसून सत्ताधारी भाजपचा माजुर्डा नगरसेवक सुरज बामणे आणि त्याचे पाळीव गुंड होते. थेट मुख्याधिकाऱ्यांना मारण्यापर्यंत या नगरसेवकांची मजल जातेच कशी? यांना कायद्याचा, पोलिसांचा धाक उरलेला नाही? या हाणामारीच्या निषेधार्थ आता घाबरलेल्या पालिकेच्या कर्मचाऱ्यांनी काळ्या फिती बांधून काम बंद आंदोलन करत या गुंडांना जेलमध्ये डांबण्याची मागणी केलीये.

तर दुसरीकडे मुख्याधिकाऱ्यांनीच मारल्याचा दावा भाजप नगरसेवकानं केलाय. मात्र शिंदेसेनेचे मंत्री भरत गोगावलेंनी मारहाण करणं चुकीचं असल्याचं म्हटलंय. २ दिवसांपुर्वी शिंदेगटाचे गुंड नगरसेवक रमेश म्हात्रेंनी महिला डॉक्टरांना बेदम मारहाण केली होती. या घटनेनंतर केडीएमसी रुग्णालयातले डॉक्टर दहशतीमुळे राजीनामा देण्याच्या तयारीत असल्याचं बोललं जातंय. विशेष म्हणजे या मारकुट्या नगरसेवकांचं अटक वॉरंट निघताच त्यांच्या छातीत दुखू लागलं आणि ते थेट रुग्णालयात जाऊन बसले. आता उपचारांच्या नावाखाली हा मारकुट्या नगरसेवक हॉस्पिटलमध्ये पाहुणचार झोडतोय आणि कायद्याचे धिंडवडे काढतोय...त्यामुळे आता कोर्टानं म्हात्रेला हजर राहण्याचे निर्देश दिले आहेत.

माजुर्ड्या नगरसेवकांच्या गुंडगिरीने महाराष्ट्राच्या लोकशाहीची ठोकशाही करून ठेवलीये. सत्तेची नशा डोक्यात गेलेल्या या गुंडांची नशा उतरवण्यासाठी आता जुजबी कारवाई नको तर यांची थेट चौकात धिंड काढण्याची गरज आहे! महाड असो की कल्याण डोंबिवली... राज्यातला प्रत्येक जिल्हा हा कायद्याचा बालेकिल्ला आहे हे मवाल्यांकडून वदवून घ्यावचं लागेल. अन्यथा जनतेचा पोलिसांवरचा विश्वास संपेल आणि कायद्यादे धिंडवडे निघतील एवढं नक्की...