बीड - परळी शहरापासून काही अंतरावर असलेल्या तळेगाव परिसरात, किंगमेकर नाव असणाऱ्या अलिशान कारने, दुचाकीस्वारास चिरडल्याची दुर्दैवी घटना घडली आहे. यामध्ये दुचाकीस्वार प्रमोद भगवान तांदळे या युवकाचा जागीच मृत्यू झाला आहे. या दुचाकीला धडक दिलेली आलिशान कार ही परळी नगर परिषदेच्या माजी नगराध्यक्षच्या मुलाची असल्याची चर्चा शहरात आहे. काही दिवसापूर्वीच या पोराच्या वाढदिवसानिमित्त, बापाने लाखो रुपयांची ही आलिशान कार घेऊन दिली होती.

तीच कार दारू पिऊन चालवणाऱ्या पोराने, एका निष्पाप युवकाचा जीव घेतला असल्याची संतप्त प्रतिक्रिया नागरिकांमधून उमटत आहे. यामुळे या कारचालकावर तात्काळ गुन्हा दाखल करुन आम्हाला न्याय देण्यात यावा. ही मागणी घेऊन परळीच्या ग्रामीण पोलीस ठाण्यासमोर, मयत प्रमोद तांदळे यांच्या नातेवाईकांनी ठिय्या आंदोलन सुरू केले आहे. दरम्यान परळी पोलीस त्या राजकीय व्यक्तीच्या मुलावर गुन्हा दाखल करणार का ? याकडे आता सर्वांचे लक्ष लागले आहे.

Edited By - Shivani Tichkule