घाटकोपर : मनसे अध्यक्ष राज ठाकरे (Raj Thackeray यांची औरंगाबादमध्ये (Aurangabad) जाहीर सभा होणार आहे. या सभेसाठी जय्यत तयारी सुरू असून मोठ्या प्रमाणात पोलीस बंदोबस्त ठेवण्यात आला आहे. अशातच राज ठाकरे यांची ही सभा बंद पाडू असा इशारा भीम आर्मीने दिला होता. त्यासाठी भीम आर्मीचे (Bhim Army) कार्यकर्ते औरंगाबादच्या दिशेने रवाना झाले होते. मात्र घाटकोपर (Ghatkopar) येथून जात असताना पोलिसांनी या कार्यकर्त्यांना ताब्यात घेतल्याची माहिती आहे.

राज ठाकरेंच्या औरंगाबाद येथील सभेसाठी पोलीस प्रशासनाने (Aurangabad Police) ठाकरेंना 16 अटी-शर्ती घालून परवानगी दिली आहे. दरम्यान, पोलिसांनी दिलेल्या 16 अटींचे उल्लंघन राज ठाकरेंकडून सभेत झाले तर आम्ही सभेतच छत्रपती शिवाजी महाराज, डॉ. बाबासाहेब आंबेडकर आणि महात्मा फुलेंच्या घोषणा देऊन राज ठाकरेंची सभा बंद पाडू, असा इशारा भीम आर्मीने सोलापुरात दिला होता.

या इशाऱ्यावर आपण ठाम असल्याचं सांगत आज (रविवारी) भीम आर्मीचे कार्यकर्ते औरंगाबादच्या दिशेने रवाना झाले होते. मात्र सोलापुरवरून औरंगाबादकडे येत असताना त्यांना वाटेतच घाटकोपर येथे पोलिसांनी ताब्यात घेतल्याची माहिती आहे. राज ठाकरे यांच्या सभेदरम्यान कुठलाही अनुचित प्रकार घडू नये म्हणून पोलिसांनी ही कारवाई केल्याची माहिती आहे.