मुंबई : विधानसभा निवडणुकीत उद्धव ठाकरेंच्या शिवसेनेची आणि मनसेची धूळधाण झाल्यानंतर आता ठाकरे बंधूंनी एकत्र येण्याची भाषा केली आहे. महाराष्ट्राच्या हितापुढे आमची भांडणं, वाद क्षुल्लक असल्याचं राज ठाकरे एका मुलाखतीत म्हणाले. राज यांनी साद घातल्यानंतर उद्धव ठाकरेंनी सकारात्मक प्रतिसाद दिला. मी सोबत येण्यास तयार आहे. माझ्याकडून सगळी भांडणं मिटली. पण माझी एक अट आहे. माझ्यासोबत येऊन हित आहे की भाजपसोबत जाऊन हित आहे, ते आधी ठरवा, असं उद्धव ठाकरे कामगार सेनेच्या मेळाव्यात म्हणाले.

राज ठाकरेंनी टाळीसाठी हात पुढे केलेला असताना उद्धव ठाकरे यांनी देखील सकारात्मक प्रतिसाद दिला आहे. त्यामुळे दोन्ही ठाकरे एकत्र येण्याची चर्चा आता रंगू लागल्या आहेत. यावर उपमुख्यमंत्री एकनाथ शिंदेंच्या शिवसेनेतून पहिली प्रतिक्रिया आली आहे. राज आणि उद्धव यांची विधानं मी ऐकलेली नाहीत. मी दौऱ्यावर असल्याने त्यांची विधानं ऐकू शकलो नाही. पण राजकारणात काहीही घडू शकतं. सकाळचा माणूस दुपारी कुठं असेल आणि दुपारचा माणूस संध्याकाळी कुठं असेल. त्याचं काही सांगता येत नाही, असं शिवसेनेचे नेते आणि मंत्री भरत गोगावले म्हणाले आहेत.

उद्धव ठाकरे आणि राज ठाकरे हे दोघेही भाऊ-भाऊ आहेत. त्यांना जर पाझर फुटला असेल एकमेकांसाठी तर आम्हाला त्यातलं काय माहीत नाही. आम्ही महायुतीचं काम करतोय. महायुती भक्कम झालेली आहे. महायुतीला आता कोणी छेद देऊ शकत नाही. दोघे एकत्र येण्याबद्दल बोलत असतील तर आम्हाला त्यात कोणतीच अडचण नाही. आम्ही आमचं काम करतोय. आमच्या कामाच्या जोरावरच सत्ता परत आलेली आहे. आम्ही इतक्या वेगानं पुढे गेलोय की आता महायुतीला रोखणं कठीण आहे, असं मंत्री भरत गोगावले म्हणाले.

राज आणि उद्धव ठाकरे मुंबई महापालिका निवडणुकीसाठी एकत्र येत आहेत का? त्यांची युती झाल्यास तुमच्या पक्षाचा तोटा होईल का? असे प्रश्न गोगावलेंना विचारले गेले. त्यावर आम्हाला तोटा होण्याची शक्यता वाटत नाही. कारण एकनाथ शिंदेंनी मुंबईतील उबाठा बऱ्यापैकी रिकामी केली आहे. राहिलेले देखील येण्याच्या तयारीत आहेत. शिंदेंचं मिशन सुरु आहे. त्यामुळे काही अडचण होणार नाही, असंही गोगावले म्हणाले आहेत.