शुभम देशमुख 

भंडारा : मागील काही दिवसांपासून दमदार पावसाची प्रतीक्षा लागून होती. यानंतर भंडारा जिल्ह्यात काही भागात पावसाची (Rain) हजेरी लागली होती. मात्र मागील २४ तासात जिल्ह्यात सर्वदूर दमदार पाऊस झाला आहे. यामुळे भंडारा (Bhandara) जिल्ह्यात वैनगंगा नदीचा जलसाठ्यात वाढ झाल्याने गोसीखुर्द धरणाचे ३३ पैकी ३० दरवाजे ०.५ मीटरने उघडण्यात आले आहे. (Latest Marathi News)

भंडारा जिल्ह्यात यावर्षी शेतकऱ्यांना दमदार पावसाची आशा होती. मात्र अद्यापपर्यंत हवा तसा पाऊस बरसलेला नव्हता. मात्र काल सायंकाळपासून पावसाचा जोर वाढला असून सर्वदूर दमदार पावसाने (Heavy Rain) सर्वच तालुक्यात हजेरी लावली आहे. रात्रभर दमदार पाऊस बरसल्याने नदी नाले ओसंडून वाहू लागले आहेत. तर जिल्ह्यात पावसामुळे कुठलेही नुकसान झाले नाही. 

गोसीखुर्द धरणाचे दरवाजे उघडले 

भंडारा जिल्ह्यातील वैनगंगा नदी दुथडी भरून वाहत असून गोसीखुर्द धरणाचे ३३ पैकी ३० दरवाजे ०.५ मीटरने उघडण्यात आले असून नदी काठील गावाना सतर्क राहण्याचा इशारा देण्यात आला आहे. तर सतत पाऊस बरसत असल्यामुळे वातावरणात गारवा निर्माण झाला आहे.