शुभम देशमुख 

भंडारा : नववर्षाचे स्वागत करताना काही जण पर्यटन करण्यासाठी जात असतात. त्यानुसार भंडारा जिल्ह्यातील रावणवाडी येथे देखील पर्यटकांची गर्दी होत असते. मात्र निसर्ग सानिध्यात असलेल्या रावणवाडी येथील पर्यटनस्थळ दोन दिवसांसाठी बंद ठेवण्याचा निर्णय घेण्यात आला आहे. यामुळे येथे पर्यटनासाठी येणाऱ्यांचा हिरमोड होणार आहे. 

भंडारा जिल्ह्यात ठिकठिकाणी थर्टी फर्स्ट आणि न्यू इयर साजरा करण्याकरिता तरुणाईंकडून मोठ्या प्रमाणात जल्लोष साजरा करण्यात येतो. यावेळी धुमाकूळ घालणाऱ्या आणि तळीरामांचा वेळीच बंदोबस्त करता यावा; यासाठी भंडारा जिल्हा प्रशासन सज्ज आहे. जिल्ह्यातील सतराही पोलीस ठाण्यांतर्गत पोलिसांचा तगडा बंदोबस्त ठेवण्यात आला आहे. त्याच्यामुळे थर्टी फर्स्ट आणि नवीन वर्षाच्या स्वागताच्या कार्यक्रमांवर पोलिसांची करडी नजर राहणार आहे.

रावणवाडी येथे होते गर्दी 

दरम्यान काहीजण पार्टीचे नियोजन करत असतात. तर काही जण निसर्गाच्या सानिध्यात जाऊन आनंद घेण्याचा प्रयत्न करत असतात. यामुळे भंडारा जिल्ह्यातील रावणवाडी या पर्यटनस्थळी गर्दी होत असते. इतर दिवसांमध्ये देखील याठिकाणी पर्यटकांची प्रचंड गर्दी होत असते. तर ३१ डिसेंबर व १ जानेवारीला अधिक पर्यटक येथे येत फिरायला येत असल्याने अधिक गर्दी होत असते. 

पशु पक्षांना धोका होण्याची शक्यता 

दरम्यान निसर्गाच्या मुक्त वातावरणाची उधळण करण्यासाठी रावणवाडी इथं मोठ्या प्रमाणात पर्यटकांची गर्दी होत असते. मात्र, पर्यटकांकडून निसर्ग आणि त्यातील पशुपक्ष्यांना धोका निर्माण होऊन अनुचित प्रकार घडण्याची शक्यता वन विभागांकडून वर्तविण्यात आली आहे. या अनुषंगाने हे पर्यटनस्थळ ३१ डिसेंबर आणि १ जानेवारीला बंद ठेवण्यात येत आहे. यानंतर मात्र हे ठिकाण खुले करण्यात येणार आहे.