शुभम देशमुख 
भंडारा : राज्य परिवहन महामंडळाच्या बस फेऱ्या लावण्यावरून चालक- वाहक आणि वरिष्ठ अधिकाऱ्यांमध्ये नेहमीच वाद होत असतात. अशाच प्रकारे बस फेरीवर चालकाच्या कर्तव्याची कामगिरी क्रमानुसार लावण्याच्या मुद्द्यावरून निर्माण झालेल्या वादातून एसटी अधिकारी आणि चालकामध्ये चांगलीच फ्री स्टाईल झाली. हा संपूर्ण प्रकार भंडाऱ्याच्या साकोली आगारात घडला. 

भंडारा जिल्ह्यातील परिवहन महामंडळाच्या (MSRTC) साकोली आगारातील पंकज काटनकर असं चालकाचं नावं असून मारहाण करणारे प्रदीप करंजेकर असं अधिकाऱ्याचं नाव असून ते वाहन परीक्षक आहेत. चालक व वाहन परीक्षक यांच्यातील वाद व मारहाणीचा हा संपूर्ण प्रकार साकोली बस स्थानकाच्या प्रवेशद्वारावर घडला. बस फेरीवर चालकाच्या कर्तव्याची कामगिरी क्रमानुसार लावण्याच्या मुद्द्यावरून वाद निर्माण झाला होता. या प्रकरणाबद्दल (Bhandara) अद्याप कुणीही पोलिसात तक्रार दाखल केलेली नाही. 

व्हिडीओ झाला व्हायरल 

बस चालकाच्या छातीवर बसून त्याला वाहन परीक्षक करंजेकर हे अश्लील शिवीगाळ करीत मारहाण करीत होते. याचा संपूर्ण व्हिडिओ समाज माध्यमावर चांगलाच व्हायरल झाला आहे. हा व्हिडिओ दोन दिवसांपूर्वीचा असल्याची माहिती समोर आली. मात्र याबाबत कोणाकडूनही पोलिसात तक्रार दाखल झालेली नाही.