भंडारा : लाखनी शहरातील विदर्भ महाविद्यालयाचा संस्थाचालक व त्याच महाविद्यालयात भूगोल विभाग प्रमुख म्हणून कार्यरत असलेल्या प्राध्यापकाने, महाविद्यालयातीलच कर्मचारी असणाऱ्या सुभाष गोपाल आगाशे नामक व्यक्तीवर गोळीबार केला आहे. अमित हुकुमचंद गायधनी असे हल्लेखोर संस्थाचालक व प्राध्यापकाचे नाव असून गायधनी हा भाजपचा पदाधिकारी असल्याची माहिती आहे. दरम्यान हा गोळीबार का करण्यात आला याचे कारण अद्याप अस्पष्ट आहे.

हे देखील पहा :

संस्थाचालक असलेला अमित हुकुमचंद गायधनी हा नवशक्ती पीठ शिक्षण संस्था मुरमाड-सावरी मध्ये सहसचिव असून या संस्थेअंतर्गत असलेल्या विदर्भ महाविद्यालय लाखनी येथे भूगोल विभाग प्रमुख म्हणून कार्यरत आहे, तसेच भारतीय जनता पक्षामध्ये उच्चपदस्थ पदाधिकारी म्हणून देखील कार्यरत आहे. सदर आरोपी आपल्या राजकीय पक्षाचा व मोठ्या ओळखीचा फायदा घेत महाविद्यालयात कार्यरत कर्मचाऱ्यांना नेहमी हमरीतुमरी ची भाषा करून अपमानित करत असल्याची तक्रार महाविद्यालयात कार्यरत असणाऱ्या प्राध्यापकांनी दिली आहे.

संपूर्ण महाविद्यालय प्रशासन या संस्थाचालकाच्या मुजोरी पणाला वैतागले असल्याची चर्चा गावात आहे. आजही त्याने कर्तव्यावर असलेल्या कर्मचाऱ्यावर बंदुकीने गोळी झाडून दहशत निर्माण करण्याचा प्रयत्न केला आहे. या गोळीबारात सुभाष गोपाल आगाशे यांना छातीजवळ गोळी लागून गंभीर दुखापत झाल्याने नागपूर येथील खाजगी रुग्णालयात उपचारासाठी दाखल करण्यात आले आहे. गोळीबारानंतर पसार होण्याच्या तयारीत असलेल्या गायधनी याला लाखनी पोलिसांनी भंडाऱ्यात अटक केली आहे. त्याच्यावर अद्याप गुन्हा दाखल करण्याची प्रक्रिया सुरु आहे.

Edited By : Krushnarav Sathe