भंडारा: मित्रांसोबत खेळायला गेलेल्या ५ वीच्या वर्गाच शिकत असणाऱ्या एका मुलाचा पाण्यात बुडून दुर्दैवी मृत्यू झाल्याची घटना, भंडाऱ्यामधील (Bhandara) तुमसर तालुक्यातील हसारा या गावामध्ये घडली आहे. देवेंद्र अजय बोंद्रे वय 12 वर्ष असं पाण्यात बुडून मृत्यू झालेल्या मुलाचे नाव आहे. देवेंद्र हा हसारा येथील जिल्हा परिषदेच्या शाळेत इयत्ता ५ वीच्या वर्गात शिकत होता.

मिळालेल्या माहितीनुसार, देवेंद्र नेहमीप्रमाणे दहा वाजता शाळेत (School) गेला होता, मधली सुट्टीत नेहमीप्रमाणे जेवन वगैरे करुन आपल्या दोन तीन मित्रांसोबत शाळेलगत असलेल्या गावातील तलावाकडे मित्रांसह खेळायला गेला होता.

खेळत असताना अचानक तलावातील पाळीवरून पाय घसरून देवेंद्र तलावात पडला आणि तो बुडू लागला. आपला मित्र तलावात बुडत असल्याचं पाहून सोबत असलेल्या विद्यार्थांनी लगेच आरडा ओरड करत गावातील लोकांना देवेंद्र तलावात पडल्याचं सांगितलं.

गावाकऱ्यांनी तात्काळ त्या तलावाकडे धाव घेत देवेंद्रला बाहेर काढलं आणि तुमसर येथील उपजिल्हा रुग्णालयात उपचाराकरिता दाखल केलं. मात्र, डॉक्टरांनी त्याला मृत घोषित केलं. मृतक देवेंद्र त्याचा मामा रामु हिंगे यांच्याकडे शिक्षण घेण्यासाठी आला होता. तो मुळचा निलज येथील रहिवासी असुन आपल्या मामाकडे शिक्षणासाठी राहिला होता. देवेंद्रच्या त्यांच्या अशा अकाली निधनामुळे हसारा गावात हळहळ व्यक्त केली जात आहे.

Edited By - Jagdish Patil