शुभम देशमुख 

भंडारा : रस्त्याच्या बाजूला खेळत असलेल्या अडीच वर्षीय बालकाला आरटीओ कार्यालयाच्या वाहनाने धडक दिली. यात या चिमुकल्याचा जागीच मृत्यू झाल्याची घटना भंडाऱ्याच्या खरबी इथं रात्रीच्या सुमारास घडली. याप्रकरणी जवाहरनगर पोलिसांनी आरटीओच्या वाहनावरील कंत्राटी वाहन चालकाविरुद्ध गुन्हा दाखल करून त्याला अटक केली आहे. 

पूर्वांश रामकृष्ण वंजारी असं मृतक अडीच वर्षीय बालकाचे नाव आहे. तर, दिशांत मुस्तकी मिर्झा (वय ३५) असं आरटीओच्या गाडीवरील वाहन चालकाचं नाव असून तो (Bhandara) भंडारा येथील रहिवासी आहे. भंडारा एलसीबीच्या पथकाने दोन दिवसांपूर्वी वाळूची वाहतूक करणाऱ्या ट्रकवर कारवाई केली होती. या ट्रकला जवाहरनगर पोलीस ठाण्यातून खरबी येथील वंजारी यांच्या राईस मिलवर वजन करण्याकरिता नेण्यात येत होतं. यावेळी ही दुर्दैवी घटना घडली. 

वजन करण्यासाठी नेण्यात येत असलेल्या ट्रकच्या पुढे असलेल्या आरटीओच्या वाहनाची धडक राईस मिल समोर खेळत (Accident) असलेल्या बालकाला बसली आणि त्यातचं त्याचा मृत्यू झाला. याप्रकरणी जवाहरनगर पोलिसांनी गुन्हा दाखल केला असून आरटीओचं वाहन देखील पोलिसांनी ताब्यात घेतलं असून चालकाला अटक केली आहे.