बीडमध्ये सध्या गुन्हेगाराच्या घटनांमध्ये वाढ झाल्याचं चित्र आहे. अशातच बीडच्या अमळनेरमधून एक धक्कादायक बातमी समोर येत आहे. उभ्या पिकात ट्रॅक्टर घातल्याच्या कारणावरून वाद निर्माण झाला. याच वादातून कुऱ्हाड, लाठ्या - काठ्या आणि दगडाने जणांना मारहाण करण्यात आल्याची माहिती समोर आली आहे. सध्या जखमींवर बीड जिल्हा रूग्णालयात उपचार सुरू आहेत.

ही धक्कादायक घटना रविवारी सायंकाळी ६ वाजता घडली. 'उभ्या पिकात ट्रक्टर का घातली?' हा प्रश्न विचारल्यामुळे पाच जणांनी मिळून पाच जणांना बेदम मारहाण केली आहे. कुऱ्हाड, लाठ्या - काठ्या आणि दगडाने हल्ला करत मारहाण केल्याची माहिती समोर आली आहे. या घटनेत दोन वृद्धांसह एकूण पाच जण जखमी झाले असून, त्यांच्यावर बीड जिल्हा रुग्णालयात उपचार सुरू आहेत.

या घटनेनंतर वर्षा मिसाळ यांनी पोलीस ठाण्यात धाव घेतली. तसेच आरोपींविरोधात तक्रार दाखल केली. वर्षा मिसाळ यांनी पोलीस ठाण्यात दाखल केलेल्या तक्रारीनुसार, नितीन सानप, कृष्णा मिसाळ, आजिनाथ मिसाळ, आप्पासाहेब मिसाळ आणि अलका मिसाळ या पाच जणांविरोधात प्राणघातक हल्ल्याचा गुन्हा दाखल करण्यात आला आहे.

या धक्कादायक घटनेप्रकरणी पोलीस अधिक तपास करत असून, या प्रकरणात आणखी काही आरोपी असल्याची शक्यता वर्तवली जात आहे. या घटनेनंतर परिसरात एकच खळबळ उडाली आहे.