योगेश काशिद, बीड

बीडमध्ये गुन्हेगारीच्या घटना थांबायचे नाव घेत नाहीये. बीडमध्ये एका कुटुंबावर जीवघेणा हल्ला करण्यात आला. लाठ्याकाठ्या, दगड आणि कोयत्याने घरात घुसून अमानुष मारहाण करण्यात आली. परळीतील जळगव्हाण तांड्यावरील ही घटना आहे. आंदोलकर्त्याला साथ का दिली? असा जाब विचारत घरात घुसून आरोपींनी कुटुंबावर हल्ला केला. आरोपींनी महिलांना देखील सोडले नाही. या हल्ल्यात दोन महिलांसह अनेक जण जखमी झाले आहेत. या घटनेचा तपास पोलिस करत आहेत.

मिळालेल्या माहितीनुसार, गावातील अंगणवाडीसंदर्भात एक तरुण आंदोलन करत होता. आंदोलनकर्त्या तरुणाला साथ का देता? म्हणून कुटुंबावर जीवघेणा हल्ला करण्यात आल्याचा धक्कादायक प्रकार परळी तालुक्यातील जळगव्हाण या तांड्यावर घडला आहे. रात्रीच्या सुमारास अजित पवार गटाच्या सरपंचाने त्याच्या सहा सहकाऱ्यांसह अनिल चव्हाण या तरुणाच्या घरी गेले. त्यानंतर त्यांनी घरात घुसून अनिल चव्हाणसह त्याच्या कुटु्ंबीयांना अमानुष मारहाण केली.

सरपंचाने आपल्या सहकाऱ्यांसह अनिल चव्हाणच्या कुटुंबीयांवर काठी, दगड आणि कोयत्याने जीवघेणा हल्ला केला. यावेळी त्यांनी तरुणासोबत महिलांनाही मारहाण केली. या हल्ल्यामध्ये दोन महिला जखमी झाल्या आहेत. अनिल चव्हाण या तरुणाला मात्र किरकोळ दुखापत झाली. पीडित जखमी महिलांवर बीडच्या शासकीय रुग्णालयात उपचार सुरू आहेत. मारहाण होऊन देखील पोलिसांकडून कसलीही कारवाई करण्यात आली नसल्याचा आरोपी पीडित कुटुंबाने केला आहे. तर पोलिस सध्या या प्रकरणाचा तपास करत आहेत.