Beed Politics News:

आगामी लोकसभा तसेच विधानसभा निवडणुकांच्या दृष्टीने राज ठाकरे यांच्या महाराष्ट्र नवनिर्माण सेनेने जोरदार मोर्चेबांधणी सुरू केली आहे. एकीकडे राज ठाकरे यांची महाराष्ट्र नवनिर्माण सेना लोकसभा निवडणुकांसाठी जोरदार तयारी करत असतानाच बीडमध्ये मनसे विधानसभा निवडणुकीच्या रिंगणात उतरणार असल्याची माहिती जिल्हाध्यक्षांनी दिली आहे.

बीडमध्ये (Beed) महाराष्ट्र नवनिर्माण सेना आता निवडणुकीच्या मैदानात उतरली आहे. बीड, परळी विधानसभेसह जिल्ह्यातील अन्य विधानसभा महाराष्ट्र नवनिर्माण सेना ही ताकतीने लढविणार आहे. अशी माहिती मनसे जिल्हाध्यक्ष सुमंत धस यांनी पत्रकार परिषद घेऊन दिली आहे.. तर लोकसभेच्या पार्श्वभूमीवर देखील मनसे मैदानात आहे.

बीड शहरासह जिल्ह्यातील विकास कामांच्या मुद्द्यावरून मनसे निवडणूक रिंगणात येणार असल्याची माहिती देखील धस यांनी दिली. आज बीड शहरासह जिल्ह्यात पायाभूत सुविधांचा अभाव आहे, पाण्यासाठी नागरिकांना वणवण भटकंती करावी लागतेय, शेतकऱ्यांचे प्रश्न आहेत, विद्यार्थ्यांचे प्रश्न आहेत, मात्र याकडे कोणताही लोकप्रतिनिधी लक्ष देत नाही. त्यामुळेच या मुद्द्यावरून आम्ही निवडणुकीच्या रिंगणात उतरलो आहोत. असे देखील सुमंत धस म्हणाले.

दरम्यान, गेल्या काही दिवसांपासून मनसे महायुतीत जाणार असल्याच्या चर्चा रंगल्या होत्या. मात्र मनसे - भाजप युतीचा अद्याप कोणताही फाॅर्म्युला नसल्याची माहिती सुत्रांनी दिली आहे. तसेच मनसे- भाजप युती होऊ शकते का? यावर राज्यातील भाजपच्या वरिष्ठ नेत्यांबरोबर सकारात्मक चर्चा झाली आहे. मात्र कोणाताही फाॅर्म्युला अद्याप नसल्याचे समोर आले आहे. (Latest Marathi News)