बीड : राष्ट्रवादी शरद पवार पक्षाचे परळी मतदारसंघातील पदाधिकारी तथा कार्यकर्ते माधव जाधव यांना काल परळीत मारहाण झाली होती. याच्या निषेधार्थ आता बीडच्या अंबाजोगाई तालुक्यातील घाटनांदुर गावात बंद पूकारण्यात आला आहे. यामुळे गावातील व्यवसायिकांनी आपल्या दुकाना बंद ठेवले असून पोलिसांनी तगडा बंदोबस्त लावला आहे. 

विधानसभा निवडणुकीसाठी (Vidhan Sabha Election) काल मतदान प्रक्रिया पार पडली. या प्रक्रियेदरम्यान वादावादी, मारहाण झाल्याच्या घटना घडल्या. अशीच एक घटना (Beed News) बीड जिल्ह्यात घडली असून परळीत शरद पवार गटाच्या माधव जाधव यांना मारहाण झाली. तर मारहाणीनंतर शरद पवार गटाच्या कार्यकर्त्यांकडून ईव्हीएम मशीनसह मतदान केंद्रातील सामान अन् काही गाड्यांची तोडफोड करण्यात आली होती. दरम्यान मारहाणीच्या निषेधार्थ आज घटनांदूर गावात बंद पाडण्यात आला आहे. 

माधव जाधव यांना धनंजय मुंडेंच्या कार्यकर्त्यांकडून काल चापट मारून अन् गचांडी देऊन मारहाण करण्यात आली. त्यानंतर राष्ट्रवादी शरद पवार गटाच्या कार्यकर्त्यांनी घाटनांदुर येथील ईव्हीएम मशीनची तोडफोड केली. त्याचबरोबर मतदान केंद्रातील सामानांची देखील तोडफोड केली होती. त्यानंतर गावात राहणाऱ्या बन्सी शिरसाट यांच्या गाडीसह अन्य गाड्यांची तोडफोड करण्यात आली. दरम्यान या सर्व घटनेनंतर घाटनांदुर गावात तणावपूर्ण वातावरण असून आज घाटनांदुर बंदची हाक देण्यात आली आहे.