बीड जिल्ह्यातील परळी शहरात रविवारी रात्रीच्या सुमारास भीषण अपघात झाला. जुन्या थर्मल पॉवर स्टेशनजवळ दोन दुचाकींची समोरासमोर धडक झाली. अपघात इतका भीषण होता, की दोन्ही दुचाकीस्वार जागीच ठार झाले. या घटनेनं परिसरातून हळहळ व्यक्त होत आहे.

जब्बार सय्यद (वय 65 रा.बरकरत नगर परळी) आणि अजय चौधरी (रा. मुंबई) अशी अपघातात ठार झालेल्या मृतांची नावे आहेत. अपघातानंतर स्थानिकांनी घटनास्थळी मोठी गर्दी केली होती. अपघाताची माहिती मिळताच पोलिसांनी तातडीने धाव घेत मृतदेह ताब्यात घेतले.

दरम्यान दोन्ही मृतदेह परळी उपजिल्हा रुग्णालय याठिकाणी दाखल करण्यात आले आहेत. मिळालेल्या माहितीनुसार, दोन्ही दुचाकीस्वार भरधाव वेगात दुचाकी चालवत होते. जुन्या थर्मल पॉवर स्टेशनजवळ त्यांची समोरसमोर धडक झाली. याप्रकरणी रात्री उशिरापर्यंत गुन्हा दाखल करण्याची प्रक्रिया सुरू होती.

संगमनेर एसटी बस आणि रुग्णवाहिकेचा अपघात

अहमदनगर जिल्ह्यातील संगमनेर तालुक्यातील कोकणगाव शिवारात एसटी बस आणि रुग्णवाहिकेचा अपघात झाला. तालुक्यातील कोंची येथून रुग्णाला घेऊन संगमनेरकडे जात असताना दोन्ही वाहनांची समोरासमोर धडक झाली. या अपघातात रुग्णवाहिकेतील रुग्णाचा मृत्यू तर चालक आणि नातेवाईक जखमी झाले.

भंडाऱ्यात ट्रकचा भीषण अपघात, चालक गंभीर

भंडारा जिल्ह्यातील उसर्रा गावाजवळच उभ्या असलेल्या एका ट्रकला दुसऱ्या ट्रकने पाठीमागून जोरदार धडक दिली. या धडकेत ट्रकचालक गंभीर जखमी होऊन ट्रकच्या कॅबिनमध्ये अडकून पडला. अपघाताची माहिती मिळताच ग्रामस्थांनी घटनास्थळी मोठी गर्दी केली होती. कॅबिनचा पत्रा कापून ट्रकचालकाला बाहेर काढण्यात आलं.