बीड : बीडच्या माजलगाव शहरात वीज चोरीचे प्रकार वाढल्यामुळे वीज वितरण (MSEDCL) कंपनीने मीटरमधून होत असलेल्या चोरी रोखण्यासाठी अनेक ठिकाणी मीटरिंग बॉक्स बसवले आहे. यामुळे (Beed News) मीटरमध्ये छेडछाड करणाऱ्या 8 जणांवर वीजचोरीचा गुन्हा दाखल करण्यात आला. (Breaking Marathi News)

माजलगाव शहरात वीज वितरण कंपनीचे 8 हजार ग्राहक आहेत. यापैकी बहुतांश ग्राहक मीटरमध्ये छेडछाड किंवा बायपास करून वीज चोरत असतात. परिणामी वीज वितरण कंपनीला मोठा तोटा सहन करावा लागत आहे. त्यामुळे आता विजेच्या खांबावर मीटरिंग बॉक्स बसवून वीजचोरी रोखण्याचे प्रयत्न सुरू केले आहेत.

१३ ग्राहकांची वीजचोरी उघडकीस

मागील 8 दिवसांत 13 ग्राहकांकडून वीजचोरी होत असल्याचा प्रकार उघडकीस आले. त्यापैकी पाच जणांनी दंडासह रक्कम भरण्याचे मान्य केले. यामुळे वीज वितरण कंपनीच्या अधिकाऱ्यांनी उर्वरित 8 जणांवर माजलगाव शहर पोलिसात वीजचोरीचा गुन्हा दाखल केला आहे.