बीड : बीडच्या वडवाडी गावात बंदुकीचा धाक दाखवून 8 ते 10 जणांनी सशस्त्र दरोडा टाकला. दरोडेखोरांनी बळीराजा कृषि विज्ञान मंडळाचे प्रमुख अभिमान अवचर यांच्या कार्यालय आणि घरी धाडसी (Theft) दरोडा टाकून पती- पत्नीला मारहाण करत 9 लाख रुपये रोख आणि 5 तोळे सोने (Gold) चोरून नेले. ही घटना मध्यरात्रीच्या दरम्यान घडली आहे. (Beed News Theft)

बीड (Beed) तालुक्यातील वडवाडी येथे बळीराजा कृषि विज्ञान मंडळाचे प्रमुख अभिमान अवचर यांचे घर व कार्यालय आहे. मध्यरात्री 8 ते 10 दरोडेखोरांनी अवचर यांच्या घरी व कार्यालयावर दरोडा टाकला. यावेळी बंदुकीचा धाक दाखवून तब्बल 9 लाख रुपयांच्या रोकडीसह 5 तोळे सोने पळविले आहे.

घटनेने वडवाडीच्या बालाघाट परिसरात एकच खळबळ उडाली असून घटनेची माहिती देताच नेकनूर पोलिसांसह (Police) एलसीबीच्या अधिकारी, पोलीस कर्मचाऱ्यांनी घटनास्थळी येत पाहणी केली. यावेळी श्वानपथकाला देखील पाचारण करण्यात आले होते. दरम्यान या प्रकरणी बीडच्या नेकनूर पोलीस ठाण्यात गुन्हा दाखल करण्याची प्रक्रिया सुरू आहे.