बीड : येत्या विधानसभा निवडणुकीत मैदानात उतरण्याचा माझा निर्धार झाला आहे. मात्र पक्ष, झेंडा कोणता हे येत्या पाच तारखेला सांगतो अशी रोखठोक भूमिका माजलगाव मतदारसंघातील भाजप नेते मोहन जगताप यांनी घेतली आहे. यामुळे माजलगाव मतदारसंघातून बंडखोरीचे संकेत आपल्या बोलण्यातून दिले आहेत. 

बीड (Beed News) जिल्ह्यातील माजलगाव येथे आयोजित कार्यकर्ता मेळाव्यानंतर मोहन जगताप यांनी माध्यमांशी बोलताना आपली प्रतिक्रिया दिली. २०१९ च्या विधानसभा निवडणुकीत भाजप नेते पंकजा मुंडे यांना ब्लॅकमेल करून माजलगाव (Majalgaon) मतदारसंघात दुसऱ्यांनीच उमेदवारी मिळवली. परंतु त्याचा काही उपयोग झाला नाही. पंकजा मुंडे यांचा तर पराभव झालाच, परंतु माजलगावमधून भाजपकडून उभा उमेदवाराचा देखील पराभव झाला. मात्र यावेळी मी माघार घेणार नाही. निवडणूक लढवणारच असल्याचे देखील मोहन जगताप यांनी म्हटले. 

आमदार सोळंके यांच्यावरही केली टीका 

यावेळी त्यांनी महायुतीचा घटक पक्ष असलेल्या अजित पवार राष्ट्रवादी काँग्रेसच्या आमदार प्रकाश सोळंके यांच्यावरही टीकास्त्र सोडले. आमदार हे बाहेरचे गुत्तेदार आणून टक्केवारी घेत आहेत. स्थानिकांना काम देत नाहीत. विकास कामात माजलगाव मतदारसंघ मागे पडला आहे. माझ्यावर वैयक्तिक टीका करत आहेत. परंतु त्यांच्यावर वैयक्तिक टीका करायला लागलो, तर त्यांना रस्त्यावर चालले मुश्किल होईल; असे देखील मोहन जगताप यांनी म्हटले आहे.