योगेश काशिद, साम प्रतिनिधी

बीडच्या गेवराई तालुक्यातील अर्धमसला गावात असलेल्या मशिदीमध्ये स्फोट झाल्याची घटना घडली. गावातील दोन युवकांनीच मशिदीमध्ये जिलेटीनच्या माध्यमातून स्फोट घडवून आणला होता. पोलिसांनी स्फोट करण्याप्रकरणी दोन आरोपींना अटक केलीय. यातील एक आरोपी विजय गव्हाणे याने स्फोट घडवण्याआधी इंस्टाग्रामवर रील बनवली होती. दरम्यान या स्फोट प्रकरणी पोलिसांनी श्रीराम सागडे नावाच्या व्यक्तीलाही ताब्यात घेतले आहे.

गेवराई तालुक्यातील अर्धामसला गावातील दोन युवकांनीच मशिदीमध्ये स्फोट घडवून आणला. या प्रकरणाची गंभीर दखल पोलिसांनी घेत दोन आरोपींना तात्काळ अटक केली. वादातून या दोन आरोपींनी स्फोट घडवून आणाला. अर्धामसला गावात मध्यरात्री ३ वाजण्याच्या सुमारास गावातील दोन युवकांनी मशिदीमध्ये जिलेटीनच्या माध्यमातून स्फोट घडवला.

या घटनेने जिल्हाभरात खळबळ उडाली. या घटनेची माहिती मिळाल्यानंतर पोलीस अधीक्षकांनी पहाटेच घटनास्थळ गाठून तपास सुरू केला. स्फोट करण्याआधी गव्हाणेने इंस्टाग्रामवर 'शिस्तीत रहा बेट्या, मी अंगार,भंगार नाय रं' असे बोल असलेल्या गाण्याची रील बनवली. या रीलमध्ये त्याने एका हातात जिलेटीन घेतले आहे. तर दुसऱ्या एका हातात पेटवलेली सिगारेट दिसत आहे.

विशेष पोलीस महानिरीक्षक संभाजीनगर परिक्षेत्राचे वीरेंद्र मिश्रा यांनी देखील घटनास्थळाची पाहणी केलीय. तलवाडा पोलीस ठाण्यात २ आरोपींविरोधात गुन्हा दाखल करून त्यांना ताब्यात घेण्यात आले आहे. तर बॉम्ब शोधक पथक आणि फॉरेन्सिक पथकाने या ठिकाणी तपासणी केली. पुढील तपास पोलिसांकडून केला जात आहे, तर पोलिसांनी शांततेच आवाहन केले आहे.