बीडच्या परळीत मुंडे टोळक्यांनी एका युवकाला बेदम मारहाण केली होती. नंतर जबरदस्तीने पाया पडायला लावलं. याचा व्हिडिओ सोशल माध्यमांमध्ये व्हायरल होताच पोलिसांनी कारवाई करत ७ आरोपींना बेड्या ठोकल्या. विशेष म्हणजे, या अमानुष मारहाणेपूर्वीचा धमकीचा कॉल रेकॉर्डिंग आता समोर आला असून, कॉल रेकॉर्डींग सोशल मीडियावर मोठ्या प्रमाणात व्हायरल होत आहे.

परळीतील शिवराज दिवटे या युवकाला सात ते आठ जणांनी मिळून बेदम मारहाण केली. मारहाण होण्याआधीची कॉल रेकॉर्डिंग सध्या सोशल मीडियावर मोठ्या प्रमाणात व्हायरल होत आहे. या रेकॉर्डिंगमध्ये शिवराज दिवटे आणि आरोपींमध्ये फोनवर झालेला संवाद स्पष्टपणे ऐकायला मिळत आहे.

साम टीव्हीच्या हाती लागलेल्या कॉल रेकॉर्डिंगनुसार, आरोपींकडून शिवराज दिवटे यांना धमकी देण्यात आली होती. "परळीत ये, तुला काय आहे ते दाखवतो... कोयत्याने तोडतो," अशा प्रकारच्या जीवे मारण्याच्या धमक्या या संवादात ऐकायला मिळत आहेत.

या प्रकरणात वाल्मीक कराड आणि गोट्या गीते टोळीच्या गुंडांकडून शिवराज यांना बेदम मारहाण करण्यात आली होती. या टोळीचा सूत्रधार आदिनाथ उर्फ आदित्य गीते असून, त्यानेच दिवटे यांना थेट फोन करून धमकी दिल्याचं रेकॉर्डिंगमधून समोर आलं आहे.

या रेकॉर्डिंगमुळे या गुन्ह्याचे गांभीर्य अधिकच वाढले आहे. आधीच अमानुष मारहाण झाल्यानं बीडमध्ये संताप व्यक्त केला जात असतानाच, आता या कॉल रेकॉर्डिंगमुळे हे प्रकरण अधिक चिघळण्याची शक्यता आहे. या धक्कादायक घटनेमुळे बीड पुन्हा एकदा हादरले आहे.