विनोद जिरे, मनोज जयस्वाल

Beed News:

बीड जिल्ह्यातून अपघाताची एक मोठी बातमी समोर आली आहे. कल्याण विशाखापट्टणम महामार्गावरील माऊली फाट्यावर ऊस वाहतूक करणाऱ्या ट्रक व दुचाकीची समोरासमोर धडक झालीय. या भीषण अपघातात दुचाकीवरून प्रवास करत असलेल्या मायलेकांचा मृत्यू झालाय.

भागवत उर्फ पप्पू सुभाष इंगळे (वय 22) मालन सुभाष इंगळे (वय 47 रा.राजेगाव) असे मयत मायलेकराची नावे आहेत. दरम्यान या प्रकरणी बीडच्या माजलगाव ग्रामीण पोलीस ठाण्यात गुन्हा दाखल करण्यात आला असून या घटनेने राजेगाव परिसरात हळहळ व्यक्त केली जात आहे.

कारचा टायर फुटल्याने अपघात; तीन जण गंभीर जखमी

वाहनांच्या वेग मर्यादेचं उल्लंघन केल्याने दररोज अपघाताच्या विविध घटना घडत असतात. वाशिममध्ये देखील आज सकाळी कारचा टायर फुटल्याने अपघात झाला आहे. या अपघातात तीन जण गंभीर जखमी झालेत.

घटनेबाबत अधिक माहिती अशी की, अकोला-हैदराबाद मार्गावर वाशिमच्या जांभरुण फाट्याजवळ टायर फुटल्याने कारचा अपघात झाल्याची घटना घडलीये. या अपघातात तीन जण गंभीर जखमी झाले असून वाशिमच्या खाजगी रुग्णालयात तिघांना दाखल करण्यात आलेय.

कारचा अपघात इतका भीषण होता की गाडीने पलटी मारून डिव्हाडरला धडकली आणि धडकून परत रस्त्यावर येऊन पलटली सुदैवाने या घटनेत कुणाचा मृत्यू नाही. मात्र या अपघातात गाडीचा चक्काचूर झालाय.