बारामतीत मोठा राडा झाला आहे. बारामती नगरपरिषदेचे नगराध्यक्ष सचिन सातव यांच्यावर शाईफेक झाल्याची घटना उघडकीस आली आहे. बारामतीमधील सुपा येथे नगराध्यक्ष सचिन सातव यांच्या अंगावर शाईफेक करण्यात आली आहे. वंचित बहुजन आघाडीच्या कार्यकर्त्यांनी शाईफेक केल्याची माहिती मिळत आहे. या घटनेने परिसरातल राजकीय वातावरण तापलं आहे.

देशभरात अनेक ठिकाणी प्रजासत्ताक दिन मोठ्या उत्साहात साजरा करण्यात आलाय. देशातील विविध ठिकाणी विशेष कार्यक्रमाचे आयोजन करण्यात आलं होतं. बारामतीत काल पालिकेच्या प्रजासत्ताक दिनाच्या कार्यक्रमात डॉ. बाबासाहेब आंबेडकर यांचा फोटो लावण्यात आला नव्हता. यामुळे वंचित बहुजन आघाडीच्या कार्यकर्त्यांनी आक्रमक भूमिका घेतली. या कार्यकर्त्यांनी थेट नगराध्यक्ष सचिन सातव यांच्यावर शाईफेक केली. तसेच कार्यकर्त्यांनी घोषणाबाजी देखील केली. या शाईफेकीचा व्हिडिओ सोशल मीडियावर व्हायरल झाला आहे.

मुरूम नगरपरिषदेच्या मुख्याधिकाऱ्यांवर शाईफेक

धाराशिव जिल्ह्यातील मुरूम नगरपरिषदेत भारतीय प्रजासत्ताक दिनाच्या निमित्ताने आयोजित ध्वजारोहण कार्यक्रमांमध्ये डॉ.बाबासाहेब आंबेडकर यांनी तत्कालीन राष्ट्रपती डॉ. राजेंद्र प्रसाद यांना देत असलेली संविधानाची प्रत असा फोटो किंवा डॉ.बाबासाहेब आंबेडकरांची प्रतिमा यापैकी कोणताही फोटो न लावता ध्वजारोहणाचा कार्यक्रम आटोपला. यामुळे मुरूम शहरातील संविधानप्रेमी तरुणांनी मुरूम शहर नगरपरिषदेचे मुख्याधिकारी सचिन भुजबळ यांना जाब विचारला. त्यावेळी त्यांनी उडवाउडवीचे उत्तरे दिली.

तरुणांचा जमाव वाढत असल्याचे लक्षात घेऊन त्यांनी दुपारनंतर डॉ. बाबासाहेब आंबेडकरांच्या प्रतिमेचे अभिवादन केले. परंतु त्या कार्यक्रमाला स्वतः मुख्याधिकारी गैरहजर होते. या प्रकारामुळे संविधानप्रेमी तरुणांमध्ये तीव्र संतापाची लाट पसरली. त्यामुळे दुसऱ्या दिवशी 27 जानेवारी मंगळवार रोजी मुख्याधिकारी भुजबळ यांना लेखी माफीनामा देण्यात यावा, अशी विचारणा तरुणांकडून करण्यात येत होती. परंतु दुसऱ्या दिवशी काही तरुणांनी मुख्याधिकारी भुजबळ यांच्यावर शाइफेक करत निषेध व्यक्त केलाय. तसेच मुख्याधिकारी भुजबळ यांच्या निलंबनाची मागणी केली आहे.