Aurangabad News: कन्नडचे माजी आमदार हर्षवर्धन जाधव आणि शिवसेनेचे माजी खासदार चंद्रकांत खैर एकत्र आल्याच्या चर्चा आहेत. 2019 लोकसभा निवडणुकीत बंडखोरी करणारे हर्षवर्धन जाधव यांनी 2024 च्या लोकसभा निवडणुकीत चंद्रकांत खैरे यांना पाठींबा देणार असल्याचे जाहीर केले आहे.

हर्षवर्धन जाधव यांचा एक व्हिडिओ व्हायरल झाला आहे. या व्हिडिओत जाधव यांनी 'मी 2019 च्या विधानसभा निवडणुकीत चुकलो. पण आता नाही चुकणार नाही. मी माझे घरघुती वैयक्तिक कलह जे असतील ते बाजूला ठेऊन तालुक्याच्या जनतेसाठी, शेतकऱ्यांसाठी आणि सर्वसामान्यांच्या न्याय हक्कासाठी तटस्थ राहील, असे म्हटले आहे. (Latest Marathi News)

चंद्रकांत खैरेच निवडून येणार - जाधव

व्हायरल झालेल्या या व्हिडिओमध्ये हर्षवर्धन जाधव यांनी औरंगाबाद लोकसभा निवडणुकीत खैरेच निवडून येणार असल्याचा दावा केला आहे. ते म्हणाले की, इम्तियाज जलील म्हणत आहेत की, लोकसभेत तेच निवडून येतील, पण तसे नाही. आता चंद्रकांत खैरेच निवडून येतील कारण त्यांना मी पाठींबा देणार आहे असे त्यांनी स्पष्ट केले. यादरम्यान एका कार्यक्रमात चंद्रकांत खैरे आणि हर्षवर्धन जाधव कार्यक्रमात एकत्र आल्याने पुन्हा एकदा राजकीय वर्तुळात चर्चांना उधाण आलं आहे.

शिंदे गटही लढवणार लोकसभा?

संभाजीनगर लोकसभेची जागा शिंदे गटाच लढणार असल्याचं वक्तव्य शिंदे गटाचे मंत्री संदिपान भुमरे यांनी पंढरपूर येथे केले आहे. 'लोकसभा निवडणुकीत छत्रपती संभाजीनगरची जागा आजपर्यंत शिवसेना लढवत आली आहे. त्यामुळे शिंदे गटच ही जागा लढणार' असे संदिपान भुमरे म्हणाले. तसेच पक्षाने आदेश दिल्यास लोकसभा निवडणूक लढणार असल्याचेही त्यांनी स्पष्ट केले.