नवनीत तापडीया -

औरंगाबाद: शेतीत फायदा मिळत नाही त्यामुळे रानामध्ये गांजाची लागवड करायची का? असा सवाल अनेक संतप्त शेतकरी विचारत असतात. शिवाय मागील काही दिवसांमध्ये अतिवृष्टीमुळे हैराण झालेल्या एका शेतकऱ्यांने तर थेट मुख्यमंत्र्यांना शेतामध्ये गांजा लावण्याची परवानगी द्या अशा आशयाचं पत्र लिहलं होतं.

याबाबतच्या बातम्या देखील आपण वाचल्या होत्या मात्र आता एका शेतकऱ्याने आपल्या दोन एकर क्षेत्रातील कपाशी व तूर पिकांमध्ये चक्क गांजाची लागवड केल्याचा खळबळजनक प्रकार उघडकीस आला आहे.

पाहा व्हिडीओ -

ही घटना सोयगाव तालुक्यातील जरंडी शिवारात उघडकीस आला आहे. या घटनेची माहिती मिळताच सोयगाव पोलिसांनी घटनास्थळी जाऊन तब्बल तीन तास कारवाई करत 63 किलो 950 ग्रॅम गांजाची झाडं जप्त करून तीन लाख वीस हजार 950 रुपयांचा मुद्देमाल शेतातून जप्त केला आहे.

याप्रकरणी शेतात झाडे लावून बसलेल्या सुभाष महाजन या संशयित शेतकऱ्याला सोयगाव पोलिसांनी ताब्यात घेतले आहे. त्यामुळे आता शेतामध्ये गांजाची शेती करण्याच्या प्रकरणामध्ये वाढ होत असून ही चिंतेची बाब असल्याचं मतं नागरिक व्यक्त करत आहेत.