बुलढाणा : जिल्ह्यातील मलकापूर तालुक्यातील आव्हा येथील देशी दारुचे दुकान बंद करण्यासाठी महिलांनी आक्रमक पवित्रा घेतला आहे. बुलढाण्यातील अस्तित्व संघटनेच्या अध्यक्षा प्रेमलता सोनोने यांच्या नेतृत्वात शेकडो महिलांनी (Women's strike) आज रास्तारोको आंदोलन केले. आव्हा येथील देशी दारुच्या दुकान मालकाने एका ग्राहकाला क्षुल्लक कारणावरुन बेदम मारहाण केली. विजयसिंग राजपूत असं मारहाण केलेल्या ग्राहकाचं नाव आहे. विजयसिंगला या मारहाणीत गंभीर दुखापत झाली असून अकोला येथील वैद्यकीय महाविद्यालयात त्याच्यावर उपचार सुरु आहेत. दरम्यान, या घटनेचे तीव्र पडसाद उमटले आहेत. जोपर्यंत देशीदारूच्या दुकान मालकाला अटक केली जात नाही, तोपर्यंत आम्ही रस्त्यावरुन उठणार नाही, अशी भूमिका आंदोलनकर्त्या महिलांनी घेतली आहे.

मिळालेल्या माहितीनुसार, आव्हा येथील देशी दारूच्या (Alcohol shop ban demand) दुकान मालकाने विजयसिंग राजपूत या ग्राहकाला क्षुल्लक कारणावरून बेदम मारहाण केली. देशी दारू मालकाची दादागिरी दिवसेंदिवस वाढत चालली असून अनेकांना नाहक त्रास होत आहे. त्यामुळे देशी दारू दुकान मालकाला तात्काळ अटक करा.

या मागणीसाठी आव्हा येथील शेकडो महिलांनी रस्त्यावर उतरून रास्तारोको आंदोलन सुरु केले आहे. जोपर्यंत देशीदारू दुकान मालकाला अटक केली जात नाही, तोपर्यंत आम्ही उठणार नाही, अशी ठाम भूमिका अस्तित्व संघटनेच्या प्रेमलता सोनोने यांच्यासह महिलांनी घेतली आहे. दरम्यान, घटनास्थळावर पोलिसांचा ताफा पोहोचला असून आंदोलकांवर कारवाई केली जात आहे.

Edited By - Naresh Shende