Maharashtra Assembly Election 2024: राज्यात येत्या विधानसभा निवडणुकीत महायुतीच्या प्रत्येक उमेदवाराला 30 ते 40 कोटी रूपयांचे वाटप केले जाणार आहे. एकूण सुमारे 3 ते 4 हजार कोटी रुपयांचा चुराडा होईल. असा गंभीर आरोप राष्ट्रवादी काँग्रेस शरदचंद्र पवार पक्षाचे नेते आमदार रोहित पवार यांनी केला आहे. पंढरपुरमध्ये ते माध्यमांशी बोलत होते.

काय म्हणाले रोहित पवार?

राज्याच्या राजकारणात विधानसभेचा रणसंग्राम सुरु आहे. आज अनेक दिग्गज नेते आपला उमेदवारी अर्ज दाखल करणार आहेत. त्याआधी राष्ट्रवादी काँग्रेस शरदचंद्र पवार गटाचे आमदार रोहित पवार हे विठ्ठल दर्शनासाठी पंढरपुरला आले होते. यावेळी राज्यात महाविकास आघाडीचे सरकार यावे असे साकडे विठ्ठल चरणी घातल्याचे सांगितले. तसेच महायुती सरकारवर गंभीर आरोपही केले. या निवडणुकीत 3 ते 4 हजार कोटी रुपयांचा चुराडा होईल, असे ते म्हणाले.

"आमच्याविरोधात दबावतंत्र येणार आहे. गुंडांची ताकद वापरली जाणार आहे. एवढी मोठी महाशक्ती आमच्याविरोधात असतानाही जनता , सामान्य कार्यकर्ता आमच्यासोबत आहे. महाविकास आघाडी 180 जागांवर मुसंडी मारेल. आज संध्याकाळपर्यंत जागा महाविकास आघाडीचे जागा वाटप होईल. सांगोल्यात शेकापचे उमेदवार बाबासाहेब देशमुख यांचे कार्य चांगले आहे. त्यांच्यासाठी आपण प्रचार सभा घेऊ असे सांगत डॉक्टर बाबासाहेब देशमुख यांच्या पाठीशी आपण ठामपणे असल्याचे यावेळी रोहित पवार यांनी सांगितले.

रोहित पाटील अर्ज भरणार!

दरम्यान, सांगलीच्या तासगाव कवठेमहांकाळ मतदारसंघातून रोहित आर आर पाटील आपला उमेदवारी अर्ज दाखल करणार आहेत,राष्ट्रवादी शरद पवार गटाकडून ते निवडणुक लढवत असून आपल्या अंजनी या गावातून ते निघाले आहेत. आबांच्या पश्चात रोहित पाटील पहिल्यांदाच थेट विधानसभा निवडणुकीमध्ये उतरत आहेत. तासगावमध्ये आमदार रोहित पवार यांच्या उपस्थितीमध्ये भव्य रॅली काढत रोहित पाटील आपला उमेदवारी अर्ज दाखल करणार आहेत.