Amruta Fadnavis Blackmail Case: डिझानर अनीक्षा जयसिंघानी प्रकरणात मोठी अपडेट समोर आली आहे. उपमुख्यमंत्री देवेंद्र फडणवीस यांच्या पत्नी अमृता फडणवीस यांना धमकी आणि ब्लॅकमेल केल्याच्या या प्रकरणात पोलिसांनी राष्ट्रवादीचे सर्वेसर्वा शरद पवार आणि उद्धव ठाकरे यांची नावी घेतली आहे.

अनीक्षा जयसिंघानीने देवेंद्र फडणवीस यांच्या पत्नी अमृता फडणवीस यांना पाठवलेल्या एका संदेशात तिचे वडील शरद पवार आणि उद्धव ठाकरे यांच्या संपर्कात असल्याचे म्हटले होते, असा दावा मुंबई पोलिसांकडून सत्र न्यायालयात करण्यात आला आहे.

अमृता फडणवीस यांना धमकी आणि ब्लॅकमेल करण्याच्या या कटात विविध राजकीय व्यक्तींचा सहभाग असण्याची शक्यता आहे, असा दावाही पोलिसांकडून करण्यात आला आहे. तसेच याची चौकशी करणे आवश्यक असल्याचेही पोलिसांनी न्यायालयाला सांगितले. अनीक्षाच्या जामिनाला विरोध करताना मुंबई पोलिसांनी हा दावा केला.

दरम्यान अमृता फडणवीस यांना धमकी आणि ब्लॅकमेल प्रकरणी डिझायनर अनिक्षा जयसिंघानीला जामीन मंजूर झाला आहे, अनिक्षाला 16 मार्च रोजी अटक करण्यात आली होती. अनिक्षाने तिचे वडिल अनिल जयसिंघानी यांच्यावरील फौजदारी खटला मागे घेण्यासाठी एक कोटी रुपयांची लाच देऊ केली असे या प्रकरणात करण्यात आलेल्या तक्रारीत म्हटले आहे. त्यानुसार पोलिसांनी गुन्हा दाखल केला असून तपास सुरू केला आहे. (Latest Political News)

या प्रकरणात कोर्टाने सोमवारी संशयित बुकी अनिल जयसिंघानीची १४ दिवसांच्या न्यायालयीन कोठडीत रवानगी केली. जयसिंघानीला गुजरातमधून चुलत भाऊ निर्मलसह अटक करण्यात आली होती. या दोघांना सोमवारी अतिरिक्त सत्र न्यायाधीश डी.डी. आल्मले यांच्यासमोर हजर करण्यात आले.