अमर घटारे 
अमरावती : मेळघाटच्या जंगल परिसरात हिंस्त्र प्राण्यांचे वास्तव्य आहे. या भागात वाघांचे देखील अस्तित्व पाहण्यास मिळते. अशातच मासे विकून मोटरसायकलने आपल्‍या गावी परत जाणाऱ्या एका युवकावर वाघाने हल्ला केला. या हल्ल्यात युवकाचा जागीच मृत्यू झाल्याची घटना घडली आहे. घरातील कर्ता व्यक्ती गेल्याने कुटुंबावर मोठे संकट आले आहे. 

चिखलदरा तालुक्‍यातील खोंगडा बीट अंतर्गत घडलेल्या या घटनेमुळे परिसरात खळबळ उडाली आहे. विनोद चिमोटे असे वाघाच्‍या हल्‍ल्‍यात ठार झालेल्‍या युवकाचे नाव आहे. विनोद याचा मासेविक्रीचा व्‍यवसाय होता. नेहमीप्रमाणे विनोद हा मासे विक्री करण्यासाठी मेळघाट परिसरातील गावात गेला होता. मोटारसायकलने मासे विक्री करून गावाकडे परत जात असताना सदरची घटना घडली आहे. 

दुचाकीवर असताना वाघाचा हल्ला 

मासे विक्री करून सायंकाळच्या सुमारास विनोद हा मोटारसायकलने घरी जाण्यासाठी निघाला. याच वेळी जंगल परिसरातून जात असताना दबा धरून बसलेल्या वाघाने मोटारसायकलने जात असलेल्या विनोदावर अचानक हल्ला केला. यावेळी विनोदला चाहूल देखील लागली नव्हती. वाघाने हल्ला करत विनोदला फरफटत नेले. यात त्याचा जागीच मृत्यू झाला होता. 

खासदार वानखडेंनी घेतली परिवाराची भेट 

घटनेची माहिती परिसरात पसरली. दरम्यान अमरावतीचे खासदार बळवंत वानखडे यांनी अचलपूर रुग्णालयात जाऊन घटनेची माहिती घेतली. यावेळी खासदार बळवंत वानखडे यांनी मृतकाच्या नातेवाईकाचे सात्वन करत त्यांची भेट घेतली. मात्र घरातील कर्ता व्यक्ती गेल्याने परिवारावर मोठे संकट कोसळले आहे.