अमर घटारे

Amravati Climate Change : अमरावतीत दिवसा उन्हाची तीव्रता आणि रात्री तसेच पहाटेच्या वेळी थंडी अशा काहीशा वातावरणामुळे नागरिक संभ्रमात पडले आहे. वातावरणातील उकाडा वाढत असल्याने आता उन्हाळ्याची चाहूल दिसू लागली आहे.

कधी थंडी तर कधी काही तासातच उकडा असा वातावरणाचा अनुभव असतानाच हा हिवाळा की उन्हाळा असा प्रश्न नागरिकांना पडू लागलाय. या वातावरणाचा बदलाचा फटका शेतकऱ्यांनाही (Farmer) बसला आहे. सद्या सर्दी, खोकला आणि ताप अशा आजारांमध्ये वाढ झाल्याचे दिसून येत आहे.

मागील दोन महिन्यांपासून थंडीचा कडाका वाढला असताना काही दिवसांपासून वातावरणात बदल झालेला दिसून येतोय. रात्री आणि पहाटेच्या वेळी नागरिकांना स्वेटर मफलर कान टोप्या वापरावे लागतात सकाळी शाळेत जाणाऱ्या चिमुकल्यांना सुद्धा स्वेटर चा वापर करावा लागतोय. सकाळी दहा नंतर उन्हाची चाहूल लागते.

दिवसभर उन्हाचा कडाका वाढत असल्याने टोप्या तसेच दुपट्ट्यांचा वापरही वाढला आहे. ग्रामीण भागात तर आतापासूनच पाणीटंचाईचा झळा लागण्यास सुरुवात झाली आहे.