अमर घटारे

अमरावती : राष्ट्रवादी काँग्रेसला सत्तेत सोबत घेतांना त्यांचे मंथन आणि चिंतन व्हायला पाहिजे होतं. तर विचारात व विश्वासात न घेता (NCP) राष्ट्रवादीला सोबत घेतले; असा दावा शिंदे गटाचे आमदार बच्चू कडू (Bachchu Kadu) यांनी केला. (Maharashtra News)

राज्‍यातील झालेल्‍या घडामोडीत राष्‍ट्रवादीचे अजित पवार यांच्‍यासह काही आमदारांनी बंड करत भाजप व शिवसेनेला पाठींबा दिला. यानंतर अजित पवार यांना उपमुख्‍यमंत्री पद तर अन्‍य आठ आमदारांना मंत्रीमंडळात स्‍थान दिले आहे. यामुळे शिंदे गटातील आमदारांची गोची झाली आहे. याबाबत आमदार बच्चू कडू यांनी आपली खदखद बोलून दाखवली.

राष्ट्रवादीला सरकारमध्ये सोबत घेतल्याने आता एकनाथ शिंदेसोबत असणाऱ्या सर्व आमदारांची गोची झाली आहे. कारण माविआ सरकारमध्ये राष्ट्रवादीचा त्रास होता, काम होत नव्हती. शिवसेनेचे (Shivsena) मतदार संघ फोडून त्यांच्या मतदार संघाची बांधणी होत होती असा आरोप होता. मात्र त्या आरोपाला आता छेद लावण्याचा प्रयत्न आहे. तर ज्यांनी हा उठाव केला त्यांनीच आपल्या डोक्यावर ही कुऱ्हाड मारून घेऊ नये. त्यांचे आयुष्य पणाला लावता कामा नये. सत्तेसाठी काहीपण असं होऊ नये याची आम्हाला अपेक्षा आहे; अशी प्रतिक्रिया आमदार बच्चू कडू यांनी दिली