अमर घटारे, साम टिव्ही

अमरावती: अमरावती (amravati) जिल्ह्यातील कथित लव्ह जिहादचा आरोप झालेले प्रकरणातील बेपत्ता तरुणी अखेर चार दिवसांनंतर अमरावतीत पोहोचली आहे. पहाटे चार वाजता तरुणीला अमरावती पोलिस (police) साताऱ्यावरून अमरावतीला घेऊन आले. पहाटे चार वाजता अमरावतीच्या राजापेठ पोलीस स्टेशनमध्ये तरुणींचा जबाब नोंदवला गेला. रागाच्या भरात स्वतःहून घरातून निघाल्याचा जबाब या तरुणीने सातारा पोलिसात नोंदवला होता. जबाब नोंदवल्यानंतर पहाटे तरुणीला आई-वडिलांच्या स्वाधीन करण्यात आलं. या प्रकरणी खासदार नवनीत राणा आणि भाजप प्रवक्ते शिवराय कुलकर्णी यांनी लव्ह जिहादचा आरोप केला होता. मात्र, तरुणीचा जबाब नोंदवल्यांनंतर नवनीत राणा आणि शिवराय कुलकर्णी यांचा दावा फोल ठरल्याचं दिसत आहे. (Amravati Love Jihad Case)

दरम्यान अमरावतीतून (amravati) बेपत्ता असलेली हिंदू तरुणी ही स्वत:च घरातून निघून गेली असल्याची माहिती पोलीस तपासातून समोर आली आहे. पोलीस (police) आयुक्त आरती सिंग यांनी याबाबतची माहिती दिली आहे. "मला राग आल्याच्या कारणावरून मी घर सोडलं" असा जबाब या तरुणीने सातारा पोलिसांना दिला होता. त्यानंतर तरुणीला सातारा पोलिसांनी अमरावती पोलिसांच्या ताब्यात दिले. अमरावती पोलिसांनी तरुणीचा जबाब नोंदवत तिला तिच्या आई-वडिलांच्या स्वाधीन केले आहे.

अमरावती लव्ह जिहाद काय आहे प्रकरण?

अमरावतीत एका मुलीला पळवून नेऊन आंतरधर्मीय विवाह केल्याचा प्रकरण समोर आल्यानंतर वातावरण चांगलं तापलं होतं. हिंदू तरुणीचे अपहरण करून तिचा आंतरधर्मीय विवाह केला. त्यानंतर या मुलीला डांबून ठेवल्याचा आरोप मुलीच्या नातेवाईकांनी केला होता. प्रकरण समोर येताच खासदार नवनीत राणा, भाजप प्रवक्ते शिवराय कुलकर्णी, खासदार अनिल बोंडें यांच्यासह हिंदू संघटनांनी लव्ह जिहाद झाल्याचा आरोप केला होता.

इतकंच नाही तर, खासदार नवनीत राणा यांनी या बेपत्ता मुलीवरून पोलीस ठाण्यात २० मिनिटं जोरदार राडा केला होता. जर बेपत्ता झालेली तरुणी सापडली नाही तर, आंदोलन करू असा इशारा देखील राणा यांनी पोलिसांना दिला होता. याप्रकरणी पोलिसांनी एका सोहेल शहा नामक तरुणाला ताब्यात घेतलं होतं. पोलिस त्याची कसून चौकशी करीत होते. (Amravati Love Jihad News Today)