अमरावती : अमरावतीच्या माजी खासदार तथा भाजप नेत्या नवनीत राणा यांना मातृशोक झालाय. नवनीत राणा यांच्या आई राजिंद्र हरभनसिंह कौर यांनी ६१व्या वर्षी अखेरचा श्वास घेतला आहे. गेल्या काही दिवसांपासू त्यांना झालेल्या कर्करोगावर उपचार सुरु होता. मात्र, उपचार सुरु असताना त्यांची प्राणज्योत मालवली आहे. गेल्या अनेक वर्षापासून आदिवासींसोबत त्या होळी साजरी करत असत, पण नेमक्या होळीच्या तोंडावर त्यांचं निधन झालंय. उद्या सकाळी ११ वाजता मुंबई येथील गोरेगाव येथे अंत्यसंस्कार होणार आहेत. यामुळे राणा दाम्पत्याचे सर्व कार्यक्रम तसेच मेळघाटातील होळीचाही कार्यक्रम रद्द करण्यात आला आहे.