अमरावती : शेतामध्ये हरभरा काढण्यासाठी लावण्यात आलेल्या थ्रेशरमध्ये हरभऱ्याची मळणी करताना अचानक पाय घसरून शेत मजुराचा थ्रेशरमध्ये अडकून मृत्यू झाल्याची घटना अमरावती जिल्ह्यातील खल्लार जवळील बेंबळा खुर्द शेत शिवारात घडली आहे. सदर शेत मजुराचे नाव अमोल अनील डिके (रा. खाल्लर, वय ३७) असं आहे.

आज बेंबाला खुर्दमध्ये अनिल कळंके यांच्या शेतात हरबरा पिकांची मळणी सुरु असताना मृतक अमोल हा हरभऱ्याच्या गंजीवर चढून थ्रेशर मध्ये हरभरा टाकत होता, यावेळी हरभऱ्याची गंजी उचलताना असताना अचानक शेतमजुराचा पाय घसरून तो थ्रेशरमध्ये पडला. यावेळी थ्रेशर चालू होते.

मृतक अमोलचा डावा पाय थ्रेशरच्या पट्ट्यात अडकून आतमध्ये गेला. यामुळे अमोल डिके याच्या पायाचे अक्षरशः तुकडे झाले, रक्तभंबाळ अवस्थेत तेथील उपस्थित मजुरांनी दवाखान्यात नेण्याचा प्रयत्न केला. रुग्णालयात तातडीने सूचना देऊन ॲम्बुलन्स गाडी बोलावली, सदर मजुराची परिस्थिती अत्यंत गंभीर स्थितीत असल्याने त्यास तातडीने अमरावती येथील रुग्णालयात नेण्याचा प्रयत्न करण्यात आला मात्र वाटेतच त्याचा मृत्यू झाला.