ही दृश्ये नीट पाहा... ही दृश्ये आहेत अंबरनाथ नगरपालिकेत सत्तास्थापनेवरून झालेल्या भाजप आणि शिंदेसेनेच्या राड्याची...एकमेकाची डोकी फोडायला निघालेल्या या दोन्ही पक्षांच्या नगरसेवकांनी आता सत्तेसाठी गळ्यात गळे घालण्य़ाची तयारी सुरू केलीय. खंरतर, जिल्हाधिकाऱ्यांच्या निकालानंतर नगरपालिकेत शिंदेसेनेच्या पारड्यात बहुमत असतानाही शिंदेसेनेनं भाजपला युतीचा नवा प्रस्ताव शिंदेसेनेचे माजी नगराध्यक्ष सुनील चौधरी यांनी दिलाय. त्यामुळे युतीची चर्चा रंगलीय.

अंबरनाथ पालिकेत सत्तेचं गणित कितीदा बदलणार?

अंबरनाथ नगरपालिकेत शिंदेसेनेचे सर्वाधिक 27 नगरसेवक निवडून आले होते. त्यानंतर एक अपक्षाच्या मदतीने शिवसेनेचं संख्याबळ 28 वर पोहोचलं होतं. भाजपचे 16 नगरसेवक असून काँग्रेसच्या सर्व 12 नगरसेवकांनी थेट भाजपात प्रवेश केला. त्यानंतर अजित पवारांच्या राष्ट्रवादीच्या 4 नगरसेवकांनीही भाजपला पाठिंबा दिला. त्यामुळे भाजपचं संख्याबळ 32 गेलं. मात्र, यात पुन्हा मोठा ट्विस्ट आला आणि अजित पवारांच्या राष्ट्रवादीचे नगरसेवक शिंदेसेनेच्या तंबूत दाखल झाले. त्यामुळे शिंदेसेनेनं बहुमताचा आकडा पार केला.

तरीही शिंदेसेनेला भाजपची का गरज भासतेय हा खरा प्रश्न आहे. कारण शिंदेसेना आणि भाजप एकत्र आले तर अंबरनाथ पालिकेत विरोधकच शिल्लक राहणार नाही. असं असलं तरी अंबरनाथमधल्या शिंदेसेनेच्या काही नेत्यांना हा निर्णय़ मान्य नाही. त्यामुळे शिंदेसेनेतील अंतर्गत वादही चव्हाट्यावर आलाय. तर भाजपनं पक्षातल्या वरिष्ठांकडे बोट दाखवत आपले पत्ते झाकून ठेवले आहेत.

गेल्या पाच महिन्यांपासून शिंदेसेना आणि भाजपात सत्तासंघर्ष सुरू आहे. यासाठी कधी राडा झाला तर कधी एकमेकांना कोर्टात खेचलं. मात्र आता सत्तेसाठी सगळे एकत्र येण्याच्या तयारीत आहेत. युती करायचीच होती तर मग इतर पक्षांची फोडाफोडी, नगरसेवकांची खेचाखेची कशासाठी सुरू होती? हा खरा प्रश्न आहे.