बदलापूर अत्याचार प्रकरणातील आरोपी अक्षय शिंदे याचा पोलिसांनी २३ सप्टेंबर रोजी मुंब्रा बायपासला एन्काऊंटर केला. तळोजा जेलमधून पोलीस अक्षय शिंदेला बदलापूर येथून घेऊन येत होते. त्यावेळी त्याने पोलिसांच्या हातातून बंदूक हिसकावून गोळीबार केला. या गोळीबारात दोन पोलीस जखमी झाले. स्वसंरक्षणार्थ केलेल्या गोळीबारात अक्षय शिंदे मारला गेला, असं पोलिसांनी स्पष्ट केलं आहे. दुसरीकडे विरोधकांनी मात्र यावर बोट ठेवलं असून इतर आरोपींना वाचवण्यासाठी अक्षय शिंदेला मारण्यात आलं का? असा सवाल उपस्थित केला आहे.

दरम्यान, या प्रकरणावरून राजकीय आरोप प्रत्यारोप होत असताना राष्ट्रवादी शरदचंद्र पवार पक्षाचे आमदार जितेंद्र आव्हाड यांनी आपल्या अधिकृत X अकाऊंटवरून एक ऑडिओ क्लिप शेअर केली आहे. "अक्षय शिंदे याची जी हत्या झाली, ज्याला आता एन्काऊंटर म्हणून संबोधले जाते आहे; ती कुठे झाली, हे प्रत्यक्ष पाहणारा काय म्हणतो, ते ऐका...", असं आव्हाड यांनी आपल्या पोस्टमध्ये म्हटलं आहे.

"निदान एखादी कथा सांगताना ती खोटी आहे, हे उघडकीस येणार नाही, याची तरी काळजी पोलिसांनी घ्यायला हवी होती", असा टोला देखील जितेंद्र आव्हाड यांनी आपल्या पोस्टमधून लगावला आहे. सोबतच त्यांनी एक ऑडिओ क्लिप शेअर केली आहे. अक्षय शिंदेच्या एन्काऊंटरवेळी नेमकं काय घडलं? पोलिसांची व्हॅन कुठून जात होती? एन्काऊंटर कसा झाला, याबाबत कथित प्रत्यक्षदर्शीचा ऑडिओ संवाद आहे.

ऑडिओ क्लिपमध्ये काय संवाद?

"कथित व्हायरल ऑडिओ क्लिपमध्ये एक व्यक्ती दुसऱ्या व्यक्तीसोबत फोनवरून संवाद साधत आहे. अक्षय शिंदे याला पोलिसांच्या ज्या व्हॅनमधून नेलं जात होतं. त्या व्हॅनच्या पाठीमागे मी होतो, असा दावा कथित प्रत्यक्षदर्शी करीत आहेत. पोलिसांच्या व्हॅनला पडद्याने झाकण्यात आलं होतं. मात्र गाडी धावत असताना अचानक तीन ठक् ठक् ठक् असे आवाज झाले.

"मला वाटलं की गाडीच्या काही पार्ट्सचा आवाज झाला त्यामुळे मी दुर्लक्ष केले. मात्र काही वेळाने मी अक्षय शिंदेच्या एन्काउंटर झाल्याची बातमी पाहिली. भीतीपोटी मी कुणालाही याबाबत काहीच सांगितलं नाही", असंही हा व्यक्ती सांगत आहे. दरम्यान ही ऑडिओ क्लिप नेमकी कुणाची आहे, याबाबत कोणतीही माहिती समोर आलेली नाही. साम टीव्ही या ऑडिओ क्लिपची पुष्टी करत नाही.