अकोला : पंधरा दिवसांवर लग्न येऊन ठेपले होते. घरात आनंदी वातावरण व लग्‍नाच्‍या तयारीची लगबग सुरू होती. परंतु, भावी नवरदेवाने लग्‍नाच्‍या काही दिवसांपुर्वीच टोकाचे पाऊल उचलल्‍याने परिवारावर दुःखाचा डोंगर कोसळला आहे. (Maharashtra News)

अकोल्यातील (Akola) बाळापूर तालुक्यातल्या मोरगाव येथील २८ वर्षीय युवकाने गायगाव येथे रेल्वेखाली (Railway) आत्महत्या केल्याची घटना घडली. मोरगाव भाकरे येथील अजय उर्फ गजानन रामदास भोंबळे असे आत्महत्या केलेल्या युवकाचे नाव आहे. या युवकाने गायगाव रेल्वे स्थानकासमोर रेल्वेखाली स्वतःला झोकून आत्महत्या केली.

दोन्‍ही परिवारावर दुःखाचा डोंगर

अजय भोंबळे याचे पंधरा दिवसांवर २७ जानेवारीला लग्न होते. परंतु, लग्‍नापुर्वी युवकाने इतके टोकाचे पाऊल का उचलले? असा प्रश्न सर्वांना पडला आहे. दोन्ही परिवारात लग्नाची तयारी सुरू असताना युवकाच्‍या आत्‍महत्‍येमुळे वधूकडील परिवारावरही दुःखाचा डोंगर कोसळला आहे.