अक्षय गवळी, अकोला

Akola Rambhau Namdev Bhad Fake Godman Video महाराष्ट्राची ओळख पुरोगामी राज्य म्हणून असली, तरी अंधश्रद्धेच्या घटना अद्यापही समाजात खोलवर रुजलेल्या असल्याचे पुन्हा एकदा समोर आले आहे. अकोला जिल्ह्यातील मुर्तीजापूर तालुक्यातील पोही गावात एका भोंदू बाबाचा प्रकार उघडकीस आला असून, या घटनेमुळे परिसरात खळबळ उडाली आहे.

मिळलेल्या माहितीनुसार, रामभाऊ नामदेव भड उर्फ चंदनशेष किंवा चंदनमुरारी बाबा असे स्वतःला संबोधणाऱ्या व्यक्तीवर अंधश्रद्धा पसरवण्याचा आरोप करण्यात आला आहे. या बाबाच्या अंगात दर सोमवारी आणि पौर्णिमेला ‘सवारी’ येते, असा दावा केला जातो. यासंदर्भातील एक व्हिडिओ सोशल मीडियावर व्हायरल झाल्यानंतर हा प्रकार चर्चेत आला आहे.

स्थानिकांच्या माहितीनुसार, दर पौर्णिमेला आणि सोमवारी रात्री उशिरा या ठिकाणी ‘दरबार’ भरवला जातो. रात्री १ वाजल्यापासून सकाळपर्यंत भजन-कीर्तनाचा कार्यक्रम चालतो. मध्यरात्री बाबाच्या अंगात सवारी येते आणि ती सकाळपर्यंत टिकते, असा दावा भक्तांकडून केला जातो. या दरम्यान, बाबा भक्तांना विविध प्रकारचे उपाय सांगतो, जसे की लिंबू पिळणे, धागे-दोरे देणे, तसेच “तुला मूल होईल” किंवा “तू मला काय देणार?” अशा प्रकारच्या गोष्टी सांगितल्या जात असल्याचे आरोप आहेत.

यासाठी भक्तांकडून पैसे घेतले जात असून, ५० रुपयांच्या पावत्याही दिल्या जात असल्याची माहिती समोर आली आहे. विशेष म्हणजे, यापूर्वीही या बाबाविरोधात तक्रारी करण्यात आल्या होत्या. मात्र, तरीही हा प्रकार सुरूच असल्याने ग्रामस्थांमध्ये नाराजी व्यक्त होत आहे. गावकऱ्यांनी अकोल्याच्या पोलीस अधीक्षकांकडे निवेदन देत या भोंदू बाबावर तातडीने कारवाई करण्याची मागणी केली आहे. तसेच, या ठिकाणी सुरू असलेला अंधश्रद्धेचा ‘बाजार’ बंद करण्याचीही मागणी करण्यात आली आहे.

दरम्यान, व्हायरल झालेला व्हिडिओ नेमका कधीचा आहे, याबाबत अद्याप स्पष्ट माहिती समोर आलेली नाही. मात्र, या घटनेमुळे अंधश्रद्धा निर्मूलनाच्या उपाययोजनांवर पुन्हा एकदा प्रश्नचिन्ह उपस्थित झाले आहे. प्रशासनाने याकडे गांभीर्याने लक्ष देऊन योग्य ती कारवाई करावी, अशी अपेक्षा व्यक्त केली जात आहे.