महापालिका निवडणुकीच्या प्रचारात आता रंगत आलीय... आरोप प्रत्यारोपांच्या फैरी झडायला सुरुवात झालीय.. त्यात एण्ट्री झालीय ती 2014 मध्ये अजित पवारांवर भाजपनं केलेल्या 70 हजार कोटींच्या सिंचन घोटाळ्याची... अजित पवारांनी स्वतःच सिंचन घोटाळ्याचे आरोप करणाऱ्यांसोबत आपण सत्तेत असल्याचं वक्तव्य करत भाजपची गोची केलीय... तर भाजपनंही अजित पवारांनी आरोप करताना काळजी घ्यावी, असं म्हणत सूचक इशारा दिलाय..

अजित पवारांच्या वक्तव्यामुळे विरोधकांच्या हाती आयतं कोलित मिळालंय.. अजित पवारांचं वक्तव्य सूचक असून त्यांनी सत्तेतून बाहेर पडण्याचे थेट संकेत दिल्याचं राऊतांनी म्हटलंय... अजित पवार आणि रवींद्र चव्हाण यांच्यातील आरोप प्रत्यारोप फक्त पत्रकार परिषदेपुरतेच मर्यादित राहिले नाहीत.... तर रवींद्र चव्हाणांनी थेट अजित पवारांना सोबत घेण्यावेळीच देवेंद्र फडणवीसांना विचार करण्याचा सल्ला दिला होता असं म्हटलंय..

आता पिंपरी चिंचवडनंतर अजित पवारांनी पुण्यातूनही भाजपची पोलखोल केलीय..त्यावर भाजप नेत्यांनी संयमी भूमिका घेतली आहे..... आता अजित पवार पुन्हा पुण्यातून भाजपवर तोफ डागत आहेत... त्यामुळे भाजप प्रदेशाध्यक्ष रवींद्र चव्हाण विरुद्ध अजित पवार हा संघर्ष आणखी टोकदार होण्याची शक्यता आहे... मात्र या आरोप प्रत्यारोपांच्या फैरी खरंच एकमेकांवर केलेले आरोप ठरणार की विरोधकांची मीडिया स्पेस स्वतःकडे खेचण्याची नुरा कुस्ती... याकडे राज्याचं लक्ष लागलंय..