राज्यात पवार विरुद्ध पडळकर संघर्ष काही केल्या संपतांना दिसत नाही. आता निमित्त ठरलं ते ३१ मे रोजी होणाऱ्या आहिल्या देवी होळकर यांच्या जयंतीदिनाचं. पुण्यात पुण्यश्लोक अहिल्यादेवींच्या 300 व्या जयंतीनिमित्त तब्बल 50 हजार धनगरी ढोल वाजवून अभिवादन करण्यात येणार आहे. या भव्य कार्यक्रमासाठी केंद्रीय गृहमंत्री अमित शाह येणार आहेत.

तसंच मुख्यमंत्री देवेंद्र फडणवीस आणि उपमुख्यमंत्री एकनाथ शिंदेंसोबत झाडून सगळया मंत्र्यांना बोलावणं गेलय मात्र या कार्यक्रमाला अजित पवारांना बोलावणार नाही अशी भूमिका भाजप आमदार गोपीचंद पडळकरांनी घेतलीये. आणि इथेच नव्या वादाला तोंड फुटलंय. हा कार्यक्रम धनगरांचा असून धनगरांनी ठरवलेला आहे. हा कार्यक्रम शासकीय नाही. त्यामुळे अजित पवारांना बोलवणार नाही असं बोलून पडळकरांनी अजित पवारांविरोधातील हत्यार अजून म्यान केलेली नाही असं स्पष्ट केलंय.

पडळकरांच्या या भूमिकेमुळे अजित पवारांच्या राष्ट्रवादीची आणि भाजपची गोची झाली. यावर आता राष्ट्रवादीच्या अमोल मिटकरींनी जोरदार प्रत्युत्तर दिलयं. पवारांना विरोध करुन राजकीय भूमिका मांडणाऱ्या न पुढाऱ्यांमध्ये गोपिचंद पडळकरांचं नाव प्रामुख्यानं येतं. आता तर ज्या कार्यक्रमाला अमित शहांना बोलावलं जातंय तिथे मात्र उपमुख्यमंत्री अजित पवारांना बोलावणार नाही ही परखड भूमिका पडळकरांनी घेतल्यानं राज्याच्या उपमुख्यमंत्र्यांचा अपमान तोही भाजपच्या आमदाराकडूनच. म्हणून आता भाजप यावर काय भुमिका घेतय याकडे राजकीय वर्तुळाचं लक्ष लागलंय.