सचिन बनसोडे, साम टीव्ही

शिक्षकी पेशाला काळीमा फासणारी घटना समोर येत आहे. अहिल्यानगरात अल्पवयीन मुलींशी अश्लील वर्तन करणाऱ्या शिक्षकाला पोलिसांनी बेड्या ठोकल्या आहेत. आश्रमशाळेत एक शिक्षक विद्यार्थीनींसोबत अश्लील चाळे करायचा. याची माहिती पोलिसांना मिळाल्यानंतर त्यांनी आरोपीला अटक करत त्याच्याविरोधात पॉक्सो आणि ॲट्रॉसिटी कायद्याअंतर्गत गुन्हा दाखल केला आहे.

अहिल्यानगर जिल्ह्यातील राहुरी येथे एक आश्रमशाळा आहे. या शाळेतील एका शिक्षकाने तिसरी आणि चौथी या वर्गात शिकणाऱ्या विद्यार्थीनींशी अश्लील वर्तन केले आहे. गणेश खांडवे असे आरोपी शिक्षकाचे नाव आहे. हा शिक्षक तिसरी आणि चौथीतील विद्यार्थ्यांना शिकवत असल्याची माहिती आहे. शिकवत असतानाच हा शिक्षक विद्यार्थ्यांसोबत अश्लील वर्तन करायचा.

तसेच विद्यार्थीनींसमोर अश्लील चाळे करायचा. एका मुलीने आपल्या पालकांना याची माहिती दिली. विद्यार्थीनीच्या आईने थेट पोलीस ठाणे गाठत तक्रार दाखल केली. तक्रार दाखल करताच आरोपीविरोधात गुन्हा दाखल करण्यात आला. रात्री गुन्हा दाखल होण्यापूर्वीच आरोपी फरार झाला. मात्र, पोलिसांनी कसून चौकशी करण्यास सुरूवात केली.

पोलिसांनी चौकशी करून आरोपी गणेश खांडवेला बेड्या ठोकल्या आहेत. या शिक्षकाने याआधीही असा प्रकार केल्याची माहिती समोर आली आहे. चिमुकल्या मुलींच्या अजानतेपणाचा फायदा घेत त्यांच्याशी अश्लील चाळे करायचा. मुलीने आईला सांगितल्यानंतर हा प्रकार उघडकीस आला असून आणखी काही जणींची तक्रार दाखल होण्याची शक्यता आहे. आम्हाला न्याय मिळावा अशी मागणी पिडीत मुलीच्या कुटुंबियांनी केली आहे.