सुशील थोरात 

अहिल्यानगर : विधानसभा निवडणुकीसाठी काल राज्यभरात मतदानाची प्रक्रिया पार पडली आहे. आता प्रत्येक मतदारसंघात विजय कोणाचा याचे गणित मांडले जात आहे. मात्र अहिल्यानगर शहरात निकाल लागल्याआधीच राष्ट्रवादी अजित पवार पक्षाचे उमेदवाराच्या विजयाचे बॅनर लावण्यात आले आहे. 

विधानसभा निवडणुकीची (Vidhan Sabha Election) प्रचाराची रणधुमाळी आटोपल्यानंतर मतदानाची प्रक्रिया देखील पार पडली आहे. अर्थात निवडणुकीच्या रिंगणात उभ्या असलेल्या उमेदवारांचे भवितव्य पेटीत बंद झाले असून येत्या २३ नोव्हेंबरला मतमोजणी होणार आहे. दरम्यान निवडणुकीच्या रिंगणात उभ्या असलेले उमेदवार व त्यांचे कार्यकर्ते मतांची आकडेवारी काढत कोण विजयो होणार याचे गणित बांधत आहेत.

मात्र अहिल्यानगरमध्ये अजित पवार गटाचे उमेदवार विजयी होणार असल्याचे बॅनर आतापासून झळकू लागले आहे. अहिल्यानगर मतदारसंघातील राष्ट्रवादी अजित पवार गटाचे आमदार संग्राम जगताप यांच्या विजयाचे बॅनर शहरात ठीकठिकाणी लावण्यात आले आहेत.

संग्राम जगताप यांची तिसऱ्यांदा आमदार पदी निवड झाल्याबद्दल हार्दिक अभिनंदन अशा आशयाचे बॅनर लावण्यात आले असून कालच विधानसभा निवडणुकीसाठी मतदान पार पडले. येत्या २३ तारखेला प्रत्यक्ष निकाल समोर येणार आहे. मात्र ते आधीच अशी बॅनरबाजी करण्यात आली आहे.