सचिन बनसोडे 

नेवासा (अहिल्यानगर) : विधानसभा निवडणुकीत अनेक मतदारसंघात बंडखोरी झाली आहे. त्यानुसारच नेवासा मतदारसंघात शिवसेना शिंदे गटाला मिळालेल्या जागेवर भाजपचे माजी आमदार बाळासाहेब मुरकुटे यांनी बंडखोरी उमेदवारी अर्ज दाखल केला. माघारीनंतर हा अर्ज त्यांनी कायम ठेवल्याने भाजपने त्यांची पक्षातून हकालपट्टी केली आहे. 

अहिल्यानगर जिल्ह्यातील (nevasa) नेवासा विधानसभा मतदारसंघात महायुतीकडून शिंदे गटाला जागा सुटली होती. यामुळे भाजपकडून उमेदवारी न मिळाल्याने नाराज झालेले नेवासाचे माजी आमदार बाळासाहेब मुरकुटे यांनी बंडखोरी करत बच्चू कडू यांच्या प्रहार जनशक्ती पक्षाच्या पाठिंब्यावर निवडणुकीच्या रिंगणात उतरले आहेत. मात्र पक्षाने माघार घ्यायला सांगूनही मुरकुटे यांनी उमेदवारी अर्ज कायम ठेवल्याने (BJP) भाजपने त्यांच्यावर कारवाई करत त्यांची पक्षातून हकालपट्टी केली आहे. 

भाजपकडे असलेली नेवासा विधानसभेची जागा शिवसेना शिंदे गटाकडे गेली असून याठिकाणी भाजपचे जिल्हाध्यक्ष विठ्ठल लंघे यांना शिंदे गटाची उमेदवारी देण्यात आल्याने बाळासाहेब मुरकुटे यांनी बंडखोरी केली आहे. याशिवाय या मतदारसंघात महाविकास आघाडीचा उमेदवार देखील असल्याने या मतदारसंघात तिहेरी लढत होणार आहे.