सुशील थोरात

अहिल्या नगर : अहिल्यानगर जिल्ह्यातील श्रीगोंदा विधानसभा मतदारसंघात देखील बंडखोरी झाल्याचे पाहण्यास मिळत आहे. या मतदारसंघात उद्धव ठाकरे सेनेने उमेदवारी दिली असतांना राष्ट्रवादीकडून इच्छुक असलेल्या राहुल जगतापांनी देखील उमेदवारी अर्ज भरला आहे. यामुळे येथे तिरंगी लढत होण्याची शक्यता निर्माण झाली आहे. 

अहिल्यानगरच्या (Shrigonda News) श्रीगोंदा विधानसभा मतदारसंघातून शेवटच्या दिवशी माजी आमदार राहुल जगताप यांनी मोठे शक्ती प्रदर्शन करत आपला अपक्ष उमेदवारी अर्ज दाखल केला आहे. विशेष म्हणजे अपक्ष उमेदवारी अर्ज दाखल करताना राहुल जगताप यांच्या मिरवणुकीत आणि सभास्थळी बॅनरवर शरद पवारांचे फोटो झळकल्याचे पाहायला मिळालं. त्यामुळे विविध राजकीय चर्चांना उधाण आले आहे. 

राहुल जगताप हे राष्ट्रवादी शरदचंद्र पवार पक्षाकडून उमेदवारी करण्यासाठी इच्छुक होते. मात्र ऐनवेळी ही जागा शिवसेना ठाकरे गटाला (Mahavikas Aaghadi) गेल्याने राहुल जगताप यांचा पत्ता कट झाला. त्यामुळे राहुल जगताप यांनी अपक्ष निवडणूक लढण्याचा निर्णय घेतला आहे. त्यानुसार आज त्यांनी आपल्या कार्यकर्त्यांसह अपक्ष उमेदवारी अर्ज दाखल केला आहे. तर यंदा लोकसभेप्रमाणे श्रीगोंद्यात सांगली पॅटर्न दिसत असल्याचे मत राहुल जगताप यांनी व्यक्त केला आहे. तर आजच्या गर्दीवरूनच विजयाची विश्वास देखील त्यांनी व्यक्त करत संजय राऊत यांच्यावर निशाणा साधला आहे.