देशात एकीकडे शेतकऱ्यांच्या मालाला किमान आधारभूत किंमत मिळत नसल्यामुळे शेतकरी मेटाकुटीला आले आहेत. त्यातच दूध पावडर, मका, सूर्यफूल आणि मोहरीच्या तेलावरील आयात शुल्कात घट झाली आहे. आयात शुल्क घटल्याने विदेशी मालाची देशात मोठ्याप्रमाणात आयात होण्याची शक्यता आहे. त्यामुळे राज्यासह देशातील दूध सोयाबिन, मका उत्पादक शेतकऱ्यांना मोठा फटका बसणार आहे.

सध्या दुष्काळ, पाणीटंचाई आणि अवेळी पाऊस यामुळे कांदा, टोमॅटो आणि दूध उत्पादकांसह इतर पिके घेणारे शेतकरी अडचणीत आले आहेत. कांद्याच्या दरातील अनिश्चितता आणि सरकारी धोरणांमुळे राज्यातील कांदा उत्पादक शेतकऱ्यांचा हिरमोड झाला आहे. निवडणुकांआधी कांद्यावरवर निर्यात बंदी घातली होती. त्यांनतर निवडणुका जवळ येताच ही बंदी उठवण्यात आली. निवडणूक प्रचारातही हा मुद्दा गाजला होता. आता निवडणुका संपल्या. केंद्रात नवं सरकार स्थापन झालं. मात्र त्यासोबत कृषी मालावरील आयात शुल्कातही घट झाली आहे.

दरम्यान गायीच्या दूधाच्या दरातही कपात करण्यात आली आहे. दुधाच्या दरावरील कपातीविरोधात शेतकऱ्यांनी मोठं आंदोलन उभारलं होतं. त्यात आता आयात शुल्कात घट होणार आहे. त्यामुळे दूध आणि दुग्धजन्य पदार्थांसाठी भारतीय बाजारपेठ मोठ्या प्रमाणात खुली होणार आहे. त्याचा परिणार भारतीय दुग्धजन्य पदार्थांच्या दरावर होणार आहे. साहजिकच दूध उत्पादक शेतकऱ्यांच्या अडचणी वाढणार आहेत.

सरकारने कच्चे सोयातेल, कच्चे सूर्यफूल तेल आणि कच्चे पामतेलाच्या आयात शुल्क मार्च २०२४ पर्यंत ५.५ टक्के केले होते. तर रिफाईंड सोयातेल, सूर्यफूल आणि रिफाईंड पामतेल आयात शुल्क १३.७ टक्के ठेवले होते. यावरील आयात शुल्क वाढ करण्याची मागणी शेतकऱ्यांनी लावून धरली होती. मात्र सरकारने मात्र आयातशुल्क मार्च २०२५ पर्यंत कायम ठेवले आहे. यामुळे शेतकऱ्यांचा हिरमोड झाला आहे.