चेतन व्यास

वर्धा - देवळी शहरातील ठाकरे चौकात एका माथेफिरुने चक्क श्वानाच्या पोटात चाकू भोसकून हत्या केल्याचा व्हिडीओ व्हायरल झाला होता. हा व्हिडीओ व्हायरल होताच परिसरात चांगलीच खळबळ माजली होती. घटनेनंतर पोलिसांनी तात्काळ गुन्हा दाखल करत आरोपीला नागपुरातून अटक केली आहे. या माथेफीरू आरोपीने दारूच्या नशेत एका व्यक्तीशी झालेल्या वादाचा राग श्वानावर चाकूने वार करून काढला असल्याची माहिती आहे. देवळी पोलिसांनी माथेफिरुविरुद्ध गुन्हा दाखल केला होता.

हे देखील पाहा-

अक्षय मडावी असं आरोपीच नाव आहे. पोलीस स्टेशनच्या काही अंतरावरच २१ ऑगस्ट रविवारी मध्यरात्रीच्या सुमारास देवळी शहरातील ठाकरे चौकात या माथेफिरुने चांगलाच हैदोस घातला होता. दारूच्या नशेत हातात खुलेआम चाकू घेऊन तो परिसरात वावरत होता.

त्या माथेफिरुने चक्क एका गर्भवती श्वानाच्या पोटावर चाकूने सपासप वार करुन निर्दयतेने हत्या केली होती. हा घटनाक्रम परिसरात लागून असलेल्या सीसीटीव्ही कॅमेऱ्यात कैद झाला होता. घटनेचा व्हिडीओ व्हायरल झाल्यावर देवळी पोलिसांनी गुन्हा दाखल करत आरोपीला नागपुरातून अटक केली आहे.

आरोपीला या प्रकरणाचा व्हिडीओ व्हायरल झाल्याची माहिती मिळताच त्याने गावातून पळ काढला होता. देवळी पोलिसांना तो नागपुरात असल्याची माहिती मिळताच पोलिसांनी त्याला नागपूर येथे सुरु असलेल्या ताज्जूदीन बाबाच्या उर्स मधून ताब्यात घेतले. आज या आरोपीला पोलिसांकडून न्यायलयात हजर केले जाणार आहे.