Election Result 2022 Punjab : देशात पार पडलेल्या पाच राज्यातील विधानसभा निवडणुकांचे निकाल समोर येत आहेत. ५ पैकी ४ राज्यात भारतीय जनता पक्ष सरकार स्थापनेचा दावा करणार असल्याचे जवळपास निश्चित झाले आहे. मात्र, पंजाब (Punjab) काबीज करत अरविंद केजरीवाल (Arvind Kejriwal) यांच्या आम आदमी पक्षाने (AAP) ऐतिहासिक कामगिरी केली आहे. केवळ दुसऱ्याच प्रयत्नात पंजाबमधील विधानसभा निवडणुकीत आपने विजय मिळावला आहे. दरम्यान, पंजाबमध्ये आपचे सरकार स्थापन होत आहे. पंजाबमध्ये विधानसभेच्या तब्बल ९१ जागा मिळवत आम आदमी पक्ष हा सर्वात मोठा पक्ष म्हणून समोर आला आहे. तर भाजप, काँग्रेस आणि अकाली दलाचा पार सुफडा साफ झाला आहे.

पंजाबमध्ये काँग्रेस पक्षाला सगळ्यात मोठा धक्का बसला असून अंतर्गत गटबाजीचे राजकारण काँग्रेसच्या पराभवास कारणीभूत ठरल्याचे मत राजकीय विश्लेषकांकडून व्यक्त होत आहे. पंजाबचे माजी मुख्यमंत्री चरणजीत सिंग चन्नी यांचा पराभव होणे जवळपास निश्चितच झालं आहे. तर, काँग्रेसने कॅप्टन अमरिंदर सिंग यांना मुख्यमंत्रीपदावरून हटवून चरणजीत सिंग चन्नी यांना मुख्यमंत्री केल्यानंतर पंजाबच्या राजकारणात मोठा भूकंप झाला होता. मात्र, या दोन्हीही माजी मुख्यमंत्र्यांना पराभवास सामोरे जावे लागत आहे. पटियाला मधून कॅप्टन अमरिंदर सिंग पराभूत झाले आहेत. तर, चन्नी यांचा पराभव निश्चित झाला आहे. त्याचवेळी धुरी मतदारसंघातून आम आदमी पार्टीचे नेते आणि पंजाबचे भावी मुख्यमंत्री भगवंत मान मोठ्या मताधिक्क्याने विजयी झाले आहेत.

सत्तेच्या चाव्या हातात घेऊन आप सरकार स्थापन करणार आहे. बहुमत प्राप्त केल्यानंतर भगवंतसिंग मान (Bhagvant Singh Mann) म्हणाले, मुख्यमंत्री होताच सरकारी कार्यालयात भगतसिंग आणि बाबासाहेब आंबेडकर यांची छायाचित्रे लावण्याचा पहिला निर्णय मंत्रिमंडळात घेतला जाईल. 10 मार्चपासून नवा पंजाब सुरू होत आहे. आम्ही मान्य करतो की आम्ही गेल्या वेळी चुका केल्या, परंतु आम्ही चुकांमधून शिकलो. मला वाटते की यावेळी आपचा झाडू 70 वर्षांची घाण साफ करणार आहे.