चेतन व्यास

wardha Flood News : जिल्ह्यात आज दुपारपर्यंत झालेल्या मुसळधार पावसामुळे नदी, नाले ओसंडून वाहत आहे. नदी, नाल्यांना आलेल्या पुरामुळे जिल्ह्यातील अनेक रस्ते वाहतुकीसाठी बंद झाले आहे. जिल्ह्याच्या वर्धमनेरी येथील पुलावरून पाणी वाहत असतानाही पूल ओलांडणारा युवक वाहून गेला. मात्र, युवक पाण्यात बुडत असल्याचे लक्षात येताच स्थानिकांनी त्याला वाचवले. तर पुलगाव येथील वर्धा (Wardha) नदीच्या पुलावरून बैलजोडी वाहून गेली. मात्र काही अंतरावर ती बैलजोडी सुखरूप बाहेर निघाली. यात बैलजोडीला दुखापत झाली आहे.

आर्वी तालुक्याच्या वर्धमनेरी येथील पुलावरून पाणी वाहत असल्याने आर्वी वर्धमनेरी मार्ग वाहतुकीसाठी सकाळपासून बंद आहे. दुपारनंतर पावसाने विश्रांती घेतली. मात्र पुलावरील पाणी कमी झाले नाही. याच पाण्यातून बस चालक, चार चाकी आणि काही नागरिक जीवाशी खेळ करत रस्ता पार करत आहे. यातच एक युवक हा पूल पार करत असताना पुराच्या पाण्यात वाहून गेला. युवक वाहत असल्याच लक्षात येताच एका युवकाने त्याला वाचविण्यासाठी उडी मारली आणि इतर युवकांच्या मदतीने त्याचे प्राण वाचवले.

याचदरम्यान, पुलगाव येथील वर्धा नदीच्या लहान पुलावरून सुद्धा पाणी असल्याने तो मार्ग वाहतुकीसाठी बंद आहे. याच पुलावरून एक बैल जोडी जात असताना ती वाहून गेली. मात्र काही अंतरावरच ती बैलजोडी सुखरूप पुरातून बाहेर निघाली. या घटनेत बैलजोडी बाहेर निघाली असली, तरी तिला दुखापत झाली आहे. ही बैलजोडी विटाळा या गावातील सुरेश डाहे यांची असल्याच सांगितल्या जात आहे.

दरम्यान, प्रशासनाकडून पुराचे पाणी पुलावरून वाहत असल्यास वाहतूक करू नये, अशा सूचना वारंवार दिल्या जातात. मात्र तरीही नागरिकांकडून या बाबींकडे दुर्लक्ष केले जाते. जीवाची पर्वा न करता नागरिकांकडून केल्या जाणारे असे कृत्य हे धोकादायक ठरू शकतात.